भांगरभूंय | प्रतिनिधी
भांगरभूंय । प्रतिनिधी
काणकोणः राष्ट्र पयलें ही भावना लोकां मदीं वाडपाक जाय. तशें जालें ना जाल्यार प्रजासत्ताक दीस फकत नांवा खातीर मनोवप जातलें अशें चिराग नायक हाणे गांवडोंगरी हांगच्या निराकार शिक्षण संस्थेच्या तुडल हायस्कुलांत प्रजासत्ताक दीस कार्यावळींत उलयतना सांगलें.
कार्यावळीक निराकार शिक्षण संस्थेचो अध्यक्ष प्रशांत नायक, पालक- शिक्षक संघाचो अध्यक्ष संतोष गांवकार, मुख्याध्यापक तुकाराम वेळीप हाजीर आशिल्ले. गांवडोंगरी सारक्या गांवगिऱ्या आनी आदिवासी लोकांचो आंकडो चड आशिल्ल्या वाठारांत निराकार शिक्षण संस्था विद्यादानाचें जें काम करता तें पळोवन आपूण प्रभावीत जालां. संस्थेक शक्य आसा तितली मजत करतोलों अशें चिराग नायकान जाहीर केलें. आपूण अध्यक्ष आशिल्ल्या मडगांव रोटरी क्लबा वतीन शिक्षणीक साहित्य विकतें घेवपा खातीर ताणे पंदरा हजार रुपयांची देणगी हायस्कुला खातीर जाहीर केली.
आमी सगळे भारतीय भाव-भयण आसात अशें आपूण सदांच सकाळचे प्रार्थने वेळार म्हणटा अशें प्रशांत नायकान सांगलें. सुरवेक तुकाराम वेळीप हाणे येवकार दिवंन प्रास्तावीक केलें. चिराग नायकाचे हस्तुकीं तिरंगो हुबयलो. विद्यार्थ्यांनी संचलन करून झेंड्याक मानवंदना दिली आनी कवायती, पिरॅमीडाची प्रात्यक्षिकां सादर केलीं. रमाली पागीन सूत्रसंचालन केले आनी संतोष गांवकारान उपकार मानले
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
