राष्ट्रीय मतदार दीस

भांगरभूंय | प्रतिनिधी

लक्ष्मी दर्शन जाले उपरांतूच मतदान करपी लोक बाबासायबान दिल्ल्या ह्या अस्त्राचो दुरुपेग करतात. ह्या लोकांक लागूनच लोकशाय कलंकीत जाता.

स्वातंत्र्य दीस आनी प्रजासत्ताक दीस हे दोन आमचे राष्ट्रीय उत्सव आसात हें आमकां सगल्यांक खबरूच आसा. ह्या दिसा देशभक्तीक उप्पाट आतो येता. पूण ह्या दिसा इतलोच आयचो दिसूय तितलोच म्हत्वाचो आसा, हे खूबशा लोकांक खबर ना. आयज 25 जानेवारी. आयज राष्ट्रीय मतदार दीस. आयच्या दिसा भारतीय लोकशायेची बुन्याद घाली. आयच्याच दिसा म्हणल्यार 25 जानेवारी 1950 दिसा भारत वेंचणूक आयोगाची स्थापणूक जाली म्हणून हो दीस पुराय देशांत राष्ट्रीय मतदार दीस म्हूण मनयतात.
भारतीय लोकशायेन दरेक सुजाण नागरिकाक मतदानाचो मुलभूत हक्क दिला. ताका लागून मतदार वळेरेंत नांव नोंद करून दरेक नागरिकांनी वेंचणुकेंत आपलें मतदान करून लोकशायेक घटमूट करची असो उद्देश ह्या दिसा फाटल्यान आसा. म्हणून ह्या दिसा भारत वेंचणूक आयोग विवीध कार्यावळींचें आयोजन करून मतदारा विशीं लोकजागृताय करता.
ह्या दिसा 18 वर्सांची पिराय पुराय जाल्ल्या नव्या मतदारांची नोंद करून तांकां भारत वेंचणूक आयोगाचें वळखपत्र दितात. मतदान हें दरेक सुजाण नागरिकांचें राष्ट्रीय कर्तव्य आसा. 18 वर्सांची पिराय पुराय जाल्ल्या दरेक नागरिकांक संविधानाच्या अनुच्छेद 326 प्रमाण मतदानाचो हक्क दिला. मतदान करप ही लेगीत देशसेवाच आसा. ताका लागून चडांत चड लोकांनी मतदान करून भारतीय लोकशायेक घटमूट करूंक जाय. पूण आमच्या देशांत आयजूय मतदार मतदाना विशीं गंभीर आसात अशें दिसून येना.
घटनाकारांनी मतदानाचो अधिकार बहाल करून देशवासियांक खूब व्हड अस्त्र दिलां. पूण दुर्दैवान आयजूय लोकांक ताचें म्हत्व ना म्हणूनच आमच्या देशांत खंयचेय वेंचणुकेंत 60 टक्क्यां परस चड मतदान जायना. हाचोच अर्थ देशांतले 40 टक्के मतदार मतदान करिनात.
भारतीय मतदारांच्या मतदाना विशींचो हो निरुत्साह लोकशायेक मारक आसा. विशेश म्हणल्यार सुशिक्षीत वर्गातच मतदाना विशीं निरुत्साह दिसून येता. मतदाना दिसा राष्ट्रीय सुटी आसता. ह्या दिसा मतदान करपा बदला सहकुटूंब पिकनिकेक वचपाचो ट्रेंड सुशिक्षीत वर्गांत दिसून येता. आपणें एकल्यान मतदान केलें ना जाल्यार कांय फरक पडचो ना असो अविर्भाव ह्या लोकां मदीं दिसून येता. जे मतदान करतात तातूंतले कांय लोक मतदान करपा बदला आपल्या मताची विक्री करतात. ‘रोटी, बोटी आनी चपटी’ खातीर कांय जाण आपले मत अक्षरशा विकतात. हाचो अर्थ अशे सगलेच जाण करतात अशें न्हय. चडशे जाण विचार करून आमच्या देशा खातीर, समाजा खातीर योग्य अशा उमेदवाराक मतदान करतात हें न्हयकारून चलचें ना. अशा लोकांची संख्या वाडूंक जाय.
लक्ष्मी दर्शन जाले उपरांतूच मतदान करपी लोक बाबासायबान दिल्ल्या ह्या अस्त्राचो दुरुपेग करतात. ह्या लोकांक लागूनच लोकशाय कलंकीत जाता. बाबासायबांनी हें अस्त्र आमच्या हतांत दिवपा खातीर कितले कश्ट सोंसल्यात हाची जाण ह्या लोकांक ना. संविधानांत मतदानाचो मुलभूत हक्क समाविश्ट करून बाबासायबांनी आमकां सगल्यांत मोटो हक्क मेळोवन दिला. आमचो हो मतदानाचो पवित्र हक्क बजावन दरेकान लोकशाय घटमूट करूंक जाय.
दरेकान मतदानाचो हक्क जापसालदारकेन बजायत जाल्यार देशाचो फुडार बदलूंक शकता. ताका लागून दरेकान निरशेवणीची भुमिका सोडून जागृकतायेन आनी उत्साहान दरेक वेंचणुकेंत मतदानाचो हक्क बजावन राष्ट्रीय कार्यांत आपलो खारीचो वांटो उबारूंक जाय. लोकशाय घटमूट करपाची आसत जाल्यार जागरूक मतदारांचो एक व्हड वर्ग अस्तित्वांत येवप गरजेचो आसा. ताका लागून आमचो देश विकसनशीलताये कडल्यान विकसीत देश जावपा कडेन निश्चीतपणान मजत जातली. 18 वर्सां पिरायेचे सगल्या सुजाण नागरिकांनी येता ते वेंचणुकेंत मतदानाचो हक्क बजायत जाल्यारूच राष्ट्रीय मतदार दीस मनयिल्ल्याचें
सार्थक जातलें.

श्याम ठाणेदार
9922546295