भांगरभूंय | प्रतिनिधी
राष्ट्रीय पुस्तक सप्ता 14 नोव्हेंबराक सुरू जाला. तो 20 नोव्हेंबर मेरेन चलतो. ते निमतान…
राष्ट्रीय पुस्तक ट्रस्ट (एनबीटी) ही भारत सरकाराच्या उच्च शिक्षण खातें, मनीसबळ मंत्रालयान 1957 वर्सा स्थापन केल्लें एक शिखर मंडळ. ह्या वेवस्थापक मंडळाचें मुखेल उद्दिश्ट समाजांतल्या सगळ्या वर्गां खातीर आनी सगळ्या पिराय गटांच्या वाचकां खातीर दर्जेदार साहित्य देशातल्या विंगडविंगड भासांतल्यान निर्माण करून मध्यम दरान वाचकांक उपलब्द करून दिवपाचें. तशेंच साहित्य निर्मणेक प्रेरणा मेळपाक देशभरांत प्रकाशनाचें प्रशिक्षण दिवप, आंतरराष्ट्रीय पुस्तक मेळाव्यांनी वांटो घेवप, एनजीओ, लेखक वा प्रकाशक संस्थांक अर्थीक मजत अशेंय काम ते करतात.
व्यक्तीचो सर्वांगी विकास करपाक वाचनाची म्हत्वाची भुमिका आसा. एनबीटीन 1982 वर्सा देशांत पुस्तकां आनी वाचपाची गोडी लागचे खातीर दर वर्सा 14 ते 20 नोव्हेंबर असो पुस्तक सप्तक उपक्रम सुरु केला. ह्या सप्तकांत देशभरांत पुस्तक प्रदर्शनां, परिसंवाद, चर्चा, लेखकाक मेळपाची कार्यावळ, कार्यशाळा आनी हेर साहित्यीक अश्यो जायत्यो पुस्तक प्रचार कार्यावळी आनी साहित्यीक कार्यावळी घडोवन हाडटात.
एनबीटीन 1993 वर्सा नॅशनल सेंटर फॉर चिल्ड्रन लिटरेचर (एनसीसीएल) स्थापन केल्लें. एनसीसीएल कार्यशाळा, प्रदर्शनां घडोवन हाडपाक आनी वाचक क्लब स्थापन करपाक प्रोत्साहन दिवन शाळेच्या पांवड्यार वाचपाची संवय वाडोवपाक वावुरता. विद्यार्थ्यांक वाचनाची सवय लागचे खातीर राष्ट्रीय पुस्तक सप्तकात शिक्षण संस्थांनी काय कार्यावळी दर दिसाक घडोवन हाडूं येतात, देखीक, पुस्तक प्रदर्शनां, पुस्तकांचेर प्रस्नमाची, पुस्तक समीक्षा पद्दत, वण्टीपत्रक, कविता वाचन, पुस्तकाचें मुखपृश्ठ तयार करप अश्यो जायत्यो कार्यावळी या सप्तकांत शिक्षण संस्था घडोवन हाडूंक शकतात जाणे वाचनाक प्रोत्साहन मेळटले.
– अदिती योगेश मळीक
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
