भांगरभूंय | प्रतिनिधी
सद्याच्या युगांत पुस्तक वाचन चडश्या लोकांक आवडना. पूण पुस्तक हें गिन्यानाचें भांडार. ते लोकांचें इश्ट.
नॅशनल बूक ट्रस्ट आॅफ इंडिया आनी लोकमान्य कल्चरल फावंडेशन हांच्या जोडपालवान राष्ट्रीय पांवड्या वयलो पुस्तक महोत्सव हो गोंयच्या साहित्यीक, सांस्कृतीक जिविताक नवी दिशा दिवपी उपक्रम. गोंयकारां खातीर ही एक मोलादीक संद. ह्या महोत्सवान वाचन संस्कृतायेक एक नवें मोडण मेळटलें, हातूंत दुबाव ना. 4 तारखेच्यान तो सुरू जाता.
नवे पिळगेचो पुस्तका वांगडा संवाद शेणला, तो ह्या महोत्सवा निमतान जागो जातलो, हें तितलेंच खरें. तरेकवार लेखक, तांची तरेकवार भाशांतलीं पुस्तकां, वाचक आनी लेखकाचो संवाद घडून येतलो. साहित्यीक चळवळीक उर्बा मेळटली. लेखकांक नवी माची मेळटली. तांचोय थळाव्यांक फायदो जातलो. ह्या महोत्सवांतल्या प्रदर्शनाक लागून गोंयकारांक नवीं, दुर्मीळ अशीं पुस्तकां वाचपाक मेळटलीं. नवे पिळगेक पुस्तकां फक्त अभ्यासा पुरतींच मर्यादीत नात, जाल्यार तांकां अवांतर वाचन करून गिन्यान वाडोवंक मेळटा. ह्या पुस्तक महोत्सवाचो लाव तांकां जातलो. गोंयांतली वाचनाची आवड वाडत वतली. ती फक्त संवय उरनासतना संवेदनशीलताय, विचारशिलताय, मनीसपण सांबाळून दवरतली. वाचनाक लागून व्यक्तीमत्व सुदारता. मनीस विचार करपाक प्रवृ्त्त जाता. वाचन केल्यार अणभव, संस्कार, शहाणपण, आत्मविस्वास, मनोबल वाडटा.
सद्याच्या युगांत पुस्तक वाचन चडश्या लोकांक आवडना. पूण पुस्तक हें गिन्यानाचें भांडार. ते लोकांचें इश्ट. तांच्या जिणेंचो एक वांटो. कसलीच अपेक्षा दवरिनासतना केल्ली ही इश्टागत. कसलेंच दडपण ना, मागण्यो नात. ही फक्त इश्टागत. ज्ञानाचें दिवप- घेवप. पुस्तक आमकां ज्ञान दिता. नव्या विचारांक उर्बा दिता. विचार करपाक शिकयता. विद्या संपादन करपाचें पुस्तक हें एक साधन. तें सदांच चुकनासतना वाचल्यार मनीस घडटा. जगाचें दर्शन घडटा. सदच्यो घडामोडी, जिवितांतले वायट, बरे धडे फक्त पुस्तक वाचल्यार कळटा. ताण, तणाव पयस जातात.
ह्या पुस्तक महोत्सवाचो फायदो घेवप, बरे विचार आत्मसात करप म्हणजे गोंयकारांक लाबिल्ली सुवर्णसंद, अशें म्हाका तरी दिसता.
सिद्धी तिळवे
9158200956
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
