भांगरभूंय | प्रतिनिधी
उत्तराखंडांत चालू आशिल्ले 38वे राष्ट्रीय खेळां सर्तींतल्या मॉडर्न पॅण्टाथलॉनांत गोंयान चार पदकां जिखलीं. हातूंत तीन रुप्या पदकांचो आनी एका कांश्या पदकाचो आस्पाव आसा.
कालचो दीस गोंया खातीर उत्कृश्ट थारलो. बाबू गांवकारान तीन रुप्या पदकां जिखलीं. बाबून दादल्यांच्या वैयक्तीक लेझर रन गटांत रुप्या पदक, हरिचंद्र वेळीप आनी सूरज वेळीप सयत दादल्यांच्या सांघीक लेझर रन गटांत रुप्या पदक आनी नेहा गांवकारा सयत मिश्र लेझर रन रिलेंत आनीक एक रुप्या पदक जिखलें.
नेहा गांवकार, अंकिता वेळीप आनी वैष्णवी वडार हांणी बायलांच्या सांघीक लेझर रनांत कांश्या पदक जिखलें.
गोंयांत अजून मेरेन सात पदकां जिखल्यात. हातूंत दोन भांगरा पदकांचो, तीन रुप्या पदकांचो आनी दोन कांश्या पदकांचो आस्पाव आसा. सध्या गोंय पंगड गुणतकट्यांत 24वे सुवातेर आसा.
गोंयान स्क्वॉश आनी योगासन हातूंत भांगरा पदकां जिखल्यात. बायलांच्या स्क्वॉश सर्तींत गोंया खातीर आकांक्षा साळुंखेन भांगरा पदक जिखून गोंयाक पयलें भांगरा पदक मेळोवन दिल्लें. 2023त गोंयांत जाल्ले 37वे खेळां सर्तींत लेगीत तिणें भांगरा पदक जिखिल्लें.
योगसान सर्तींत शुभम देबनाथान परंपरीक योगासनांत भांगरा पदक जिखलें. मूळ पश्चीम बंगालचो आशिल्लो शुभम आतां गोंयचें प्रतिनिधित्व करता. बीच व्हॉलिबॉल सर्तींत गोंयान कांश्या पदक जिखिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
