भांगरभूंय | प्रतिनिधी
नारायण देसाय: अर्दफोंड, कोणकोणां बलराम उच्च माध्यमीक विद्यालयांत हिंदी दिसा निमतान कार्यावळ
काणकोण: राष्ट्रभाशा हिंदीक आयजूय देशाच्या स्वातंत्र्याक 77 वर्सां जाले उपरांतूय कांय राज्यांनी विरोध जाता, हें देशाचें दुर्दैव आसा. भारतीयांनी एका सुत्रांत बांदून दवरप हिंदीक शक्य आसा. म्हणूनच पुराय विचार केले उपरांत राष्ट्रभाशा म्हूण हिंदीक मान्यताय मेळ्ळी खरी, पूण हिंदी भाशेचेर राजकारण करतात. देशा विशीं, देशवासियां विशीं कांय राजकी पक्ष व्हडलेशे गंभीर नात ही दुदैवी गजाल. ताका लागून तरणाट्यांनी हिंदी भाशे खातीर आपले कर्तव्य म्हणून योगदान दिवचें अशें निवृत्त शिक्षक आनी पत्रकार नारायण देसाय हांणी सांगलें.
अर्दफोंड, कोणकोणां बलराम उच्च माध्यमीक विद्यालयांत हिंदी दिसा निमतान विद्यालयाच्या सभाघरांत जाहीर कार्यावळीचें आयोजन केल्लें. ह्या वेळार नारायण देसाय मुखेल सोयरे म्हूण मार्गदर्शन करताले.
ह्या वेळार माचयेर तांचे सयत विद्यालयाच्यो प्रभारी शिक्षिका कविता नायक गांवकार, हिंदी शिक्षिका सोनिया नायक देसाय, विद्यार्थी मंडळ मुखेली रश्मी म्हाळशी बी हाजीर आशिल्ले.
कार्यावळीची सुरवात येवकार गितान जाली. कविता नायक गांवकार हांणी येवकार आनी मुखेल सोयरे नारायण देसाय हांची वळख करून दिवन तांकां फुलांतुरो भेटोवन येवकार दिलो.
नारायण देसाय हांचे हस्तुकीं दिवली पेटोवन कार्यावळीचें उक्तावण केलें. अंकिता गांवकार, द्वितीया गांवकार आनी महेश गांवकार ह्या बारावीच्या कला आनी वाणिज्य वर्गांतल्या विद्यार्थ्यांनी हिंदी संबंदी आनी हिंदीच्या म्हत्वा विशीं आपले विचार उक्तायले. तशेंच कवितांचें वाचन केलें. इकरावी आनी बारावीच्या कला आनी वाणिज्य वर्गांतल्या विद्यार्थ्यांनी आकर्शक नाच सादर केले.
विद्यार्थ्यांनी तयार केल्ल्या वण्टीपत्रकाचें अनावरण मुखेल सोयरे नारायण देसाय हांचे हस्तुकीं केलें.
नारायण देसाय हांणी हिंदी भाशेचें म्हत्व आनी विस्तारान मार्गदर्शन करतना हिंदी भाशेचे वाडी खातीर विद्यार्थ्यांनी योगदान दिवपाची गरज उक्तायली. हिंदींतल्यान विचार उक्तायतनाच हिंदी लेखन, अनुवाद करपाक प्रोत्साहीत केलें.
उच्च माध्यमीक विद्यालया वतीन नारायण देसाय हांकां यादस्तीक भेटोवन तांचो भोवमान केलो. पुराय कार्यावळीचें सुत्रसंचालन शिक्षिका सोनिया नायक देसाय जाल्यार प्रतिकार गांवकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
