भांगरभूंय | प्रतिनिधी
केस मारपी म्हाल्याचो वेवसायाकखूब जाण ल्हान काम म्हणटात.
येणावळ उणी आशिल्ल्या ह्या वेवसायाक सदांच ल्हान लोकां कडेन जोडटाले, पूण वेळा वांगडा कांय गजाली बदल्ल्यात. आयज म्हाल्याचें काम फॅशनी कडेन जोडलां. केस मारून लोक लाखांनी जोडटात.
आदीं हारशा मुखार आशिल्ल्या कदेली मुखार बसून ल्हानश्या दुकानार केस मारताले, पूण आयज व्हड व्हड सलुना उक्तीं जाल्यांत. एसी सलून, लक्झरी सुविधा वांगडा तुमी सुसेदातीन बसून केस मारतात. आतां केस मारपाचें काम फॅशनी कडेन संबंदीत जालां. म्हाल्यान ह्या कामाक ट्रेंडी आनी स्टायलीश करपांत एका मनशाचें व्हड योगदान आसा. तांणी केस मारपाच्या कामा विशीं लोकांच्या मनांत आशिल्ली भावनांच बदलून सोडल्या. लोक म्हाल्याचें काम करून कोट्यांनी रुपया जोडपाक शकतात, हें नामनेचे हॅयर स्टायलीश जावेद हबीब हांणी सिद्ध करून दाखयले. आयज ताचे विशीं इल्लेशें.
जावेद हबीब, बॉलिबूड सेलिब्रिटीजाचे आवडटे हॅयर स्टायलिस्टां मदले एक. ब्युव्टी इंडस्ट्रींत तांकां व्हड नांव आसा. देश- विदेशांत जावेद हबीबाचे सलून आसात. केस मारपाच्या ह्या वेवसायान ते कोट्यांनी रुपया जोडटात, पूण खूब उण्या लोकांक खबर आसतलें, जावेद हबीबा कडेमन विदेशांतली डिग्री आसा. तांणी लंडनांतल्या मॉरीस इंटरनॅशनल स्कुलांत आपलें शिक्षण पुराय केलें. उपरांत ताणें जवाहरलाल नेहरू विद्यापिठांतल्यान फ्रेन्चांत पदवी घेतली. जावेद हॉटेल मॅनेजमेंट करपाक सोदताले, पूण नशिबान ताका परतून आपल्या परंपरीक वेवसाया कडेन ओडून हाडलो.
जावेद हबीबाचो आजो नजीर अहमद लॉर्ड मावंटबेटन सयत ब्रिटीश सरकारांतल्या व्हड व्हड अधिकाऱ्यांचे खाजगी हॅयर ड्रेसर आशिल्ले. देशाच्या स्वातंत्र्या उपरांत ते प्रधानमंत्री जवाहरलाल नेहरुचे खाजगी हॅयर ड्रेसर जाले. बापाय उपरांत ताचो पूत आनी जावेद हबीबाचो बापूय हबीब अहमद नेहरूचे खाजगी हॅयर ड्रेसर जाले. नेहरू भायर ते राजमाता गायत्री देवी आनी देशाच्या कितल्याशाच साष्ट्रपतींचे हॅयर ड्रेसर जाले. ताचो परिवार राष्ट्रपती भवनांत रावतालो. जावेद हबीबाचो जल्म लेगीत राष्ट्रपती भवनाच्या ब्लॉक 12च्या हावस नं. 32त जालो.
जावेद म्हाल्याचें काम करपाक सोदिनाशिल्ले. लंडनांत शिकतना तांणी मॅक़ोनाल्ड चो आवटलेट पळयलो. थंयच तांचे तकलेंत आपलो परंपरीक वेवसाय सुरू करपाचो विचार आयलो. लोक जरर बर्गर विकून पयशे जोडपाक शकतात जाल्यार हॅयर ड्रेसर कित्याक जोडपाक शकनात? तो हॅयर ड्रेसराच्यो सगळ्यो बारीकसाणी शिकलो. बापायच्या सांगण्यान ते लंडनांत हॅयर ड्रेसर डिझायनींग स्कुलांतल्यान प्रोफेशनल कोर्स पुराय केलो आनी उपरांत तांणी केस मारपाच्या वेवसायाक वेवसायीक रूप दिलें.
जावेदान म्हालाच्या कामाक नवें रूप दिलें. केस मारपाच्या कामाक ट्रेंडी आनी स्टायलीश रूप दिलें. हॅयर कटींग आनी ग्रुमींगाचेर लोकांक प्रशिक्षण दिवपाक सुरवात केली आनी आपलो पयलो आवटलेट केरळांत उक्तो केलो. पयल्याच वर्सा तांणी 50 परस अदीक सलून उक्ते केले. कातर आनी वाखरा कडेन ताचें परंपरागत नातें आशिल्लें, पूण जावोदान ताका नवें रूप दिलें. तांणी हबीब हॅयर अॅण्ड ब्युव्टी लिमिटेडाची सुरवात केली. ताचे ते सीईओ जाले. कांय वर्सांनीच ते सेलिब्रिटींचे हॅयर स्टायलीश जाले. जावेद हबीब बॉलिवूड नट- नटांचे हॅयर लू मॅनेज करताले. तांणी आपल्या कामांतल्यान आपलो मान खूब वाडयलो, आयज तांकां राजकी फुडारी, वेवसायीक आनी सोशल मिडियाचेर इन्फ्लुयंसर म्हूण वळखतात.
आयज भारतभर जावेद हबीब हॅयर अॅण्ड ब्युव्टी लिमिटेडाचे 900 परस अदीक सलून आसात. देशांतल्या 115 शारांनी चडशा सुवातांचेर जावेद हबीब सलून दिश्टी पडटले. सलुना वांगडाच ते 65 हॅयर इन्स्टिट्यूट चलयतात. फोर्ब्सच्या म्हणण्या प्रमाण जावेद हबीबाची वट्ट संपत्ती 300 कोटीं परस अदीक आसा. जावेद हबीबान 24 वरांत 410 जाणांचे केस मारून आपलें नांव लिम्का बूक रिकॉर्डांत नोंद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
