भांगरभूंय | प्रतिनिधी
फाटल्या सप्तकांत देश राममय जाल्लो. व्हडा दबाज्यान अयोध्येच्या नव्या देवळांत श्रीराम मुर्तीची प्राण प्रतिष्ठा जाली आनी देशभर त्या दिसा भक्तगणांनी केल्लो रामभक्तीचो जल्लोष मिडियान आमकां उत्स्फूर्तपणान दाखयलो. रावण नाशिल्लो जाल्यार रामायण घडचेंच नाशिल्लें. रामायणांतलो रावण हो मुळांत कोण आनी तो सगळ्या असुरी दुर्गुणांचो मेरूमणी खलनायक कसो जालो ताचो नियाळ घेवचो पडटलो.
ब्रह्मा निर्मित सप्तर्षींतले एक महान महर्षी पुलस्थ्य हांचो रावण हो नातू. ताचो बापूय ऋषी विश्रवा हो वेद, उपनिषद आनी शस्रविद्येंतूय पारंगत आशिल्लो. ताणेंच रावणाक धर्मीक ग्रंथाचें गिन्यान आनी शस्त्रास्त्रां चलोवपाचें शिक्षण दिलें. रावणाची आवय केकसी ही दैत्य कुळांतली. दैत्य आजो सुमाली हांणी नातू रावणाक दानव संस्कृताय आनी विचारप्रणालींतले शिक्षण, संस्कार दिले. रावण बापायचे वटेन ब्राह्मण तर आवयचे वटेन दानव आशिल्लो. ताका आयुर्वेदाचें आनी राज्यशास्त्राचें गिन्यान आशिल्लें. ज्योतिश शास्त्रांत तो पारंगत आशिल्लो आनी एक बऱ्यांतलो विणा वादकूय. चार वेद आनी स उपनिषदांचो सखोल जाण आशिल्लो रावण एक म्हान, कट्टर शिवभक्त आशिल्लो. ताचें रावण हें नामकरण शिवान केल्लें, जें आयच्या काळांत नकारात्मक मानतात. रावणान रचिल्लें शिवस्तोत्र खुद्द शिवाक इतलें आवडलें की फकत प्रलय करपा खातीर तांडव नृत्य करपी शिवान तें आयकून विनाश करीनासना फक्त नृत्य केले. असूर आशिल्ले कारणान रावण दशानन (दशमुखी) आशिल्लो असो सर्वसादरण अर्थ लायतात तो चुकीचो. ताचीं धा शिरां म्हळ्यार धा पंडितांच्या गिन्यानाचो तो स्वामी आशिल्लो असो अर्थ जाता. तशें पळयत जाल्यार देवी कालीचेय दशमुखी रूप आसा. चार, स, आठ, धा भूजां हें चड शक्तीचें आनी तीन, चार, धा मुखां आसप हें चड गिन्यानाचें द्योतक मानतात.
तपोबलाची महिमा खबर आशिल्लो रावण हो एक महान तपस्वी. ब्रह्माक प्रसन्न करपा खातीर ताणें तप केलें तेन्ना आपल्या एका एका मुखांतल्यान गिन्यान ब्रह्मदेवाक अर्पण करून तो ते शिर कापून तांच्या पायां लागी दवरतालो. णव शिरां कापून जाले उपरांत धांवे शिर कापता तेन्ना ब्रह्मदेवान प्रसन्न जावन ताका आडायलो आनी अमरत्वाचें वरदान दिलें. अट एकूच आशिल्ली की ताका दिल्ल्या अमृताच्या कुपीचें ताणें रक्षण करपाचें. तें रावणाचे गुपीत बिभीषणान श्रीरामाक सांगलें आनी रावणाचे अमरत्व सोंपयलें.
ऋषी विश्रवांचो व्हडलो पुत्र कुबेर हो रावणाचो व्हडलो भाव. लंकेच्या राजपाटाचेर खरो ताचो हक्क आसपाचो. पूण रावणान राज्याची मागणी केल्ली. रावण वेद, शास्त्रां आनी शस्त्रांत कुबेराच्या तुळेन उजवो आशिल्ल्यान बापायन कुबेराक समजायलो आनी राजपाट रावणाच्या हातात दिलो आनी कुबेराक देवांच्या खजीनदाराचें पद दिलें. आयजूय राज्यांत दोन दावेदार आसत जाल्यार हाय कमांड एकल्याक मुखेलमंत्रीपद दिवन दुसऱ्याक केंद्रीय मंत्रीपद दिता तशें राजकारण त्रेतायुगांतूय चलतालें अशें दिसता. एक आदर्श, प्रजावत्सल, लोककल्याणकारी राजा रावणाच्या राज्यांत सामान्य प्रजा, ऋषीमुनी खूश आशिल्ले. आयच्या काळांत राजा आपूण म्हयन्याक पाच किल कड्डणां राज्यांतल्या जनतेच्या झोळींत घालता हाचो प्रचार जाहीर सभांतल्या भाशणांत, मीडियांतल्या जायरातींत करतना दिसतात. रावणाच्या काळांत थंयची प्रजा यथेच्छ खावन, पिवन सुखी आशिल्ली तें जालेंच शिवाय तांच्या रांदचे कुडींतली आयदना भांगराचीं आशिल्लीं हें विशेश. तितली गिरेस्तकायेची परिस्थिती त्या काळांत श्रीरामाच्या अयोध्येंतूय नाशिल्ली. भांगराळी लंका पळोवन लक्ष्मणूय भारावन गेल्लो. थंयचो राजा जावपाची ताची इत्सा जागृत जाल्ली.
रावणान जीव सोडचे आदीं ताचे कडल्यान जीवनाचीं गुपितां समजावन घे म्हूण रामान लक्ष्मणाक सांगिल्लें. “शुभ कामांत कळाव करचो न्हय, आपली गुपितां
जाहीर करची न्हय आनी दुस्मानाक उणे लेखचें न्हय” हे तीन मोलादीक उपदेश रावणान मरचें आदीं लक्ष्मणाक दिले.
अशा ह्या शास्त्र, शस्त्र, कला, विद्या पारंगत बहुगुणी, बहुआयामी व्यक्तित्व रावणाचो अहंकार हो ताच्या चारित्र्याचे अध:पतन आनी ताची जीण सोंपोवपाक कारण थारलो. कठोर तपांतल्यान ब्रह्मदेव, शिवाक प्रसन्न करून तांचे कडल्यान प्राप्त केल्ल्या वरांनी ताका अजेय केल्लो खरो, पूण अहंकारान कुड्डो, मदांध जाल्लो रावण ताका शक्तिसामर्थ्य दिवपी महादेवाकूच म्हजे वांगडा लंकेक चल, तुका थंय आपूण भांगरान मढयता अशी ऑफर दिवपाक लागलो. ताका धडो शिकोवपा खातीर महादेवान आपूण येवपाक तयार आसा, पूण कैलास पर्वत वांगडां घेवन वच्चें पडटलें अशी अट रावणाक घाली. रावणान जेन्ना कैलास उखलपाक हात पर्वता पोंदा घालो तेन्ना महादेवान आपलें वजन वाडोवन ताचीं बोटां चेंपून ताका बेशुद्ध केल्लो.
कलियुगांत तंबूतल्या श्रीरामा खातीर आमी 42 दारां भांगरान मढयिल्ले भव्य देवूळ बांदतलें हें जेन्ना सत्ताधीश डंकापती आनी भक्त सांगत सुटले तेन्ना महादेवाक भांगरान मढोवपी अहंकारी रावणाची याद जाली.
अहंकारान विवेकशून्य केल्ले कारणान रावणान सीतेचें म्हळ्यार परस्त्रीचें अपहरण करपाचें पाप केलें. उपरांत मर्यादा पुरूषोत्तमान सीतेच्या सुटके खातीर किश्किंधेचो राजकुमार वालीपुत्र अंगदाक शिश्टाई घडोवन हाडपाक धाडून सामोपचाराचें पावल उखलत रावणाक झुजा आदीं एक संद दिल्ली. अहंकाराच्या नशेंत पुरतो बुडिल्ल्या रावणान दाद दिली ना, उलट फकांडां मारली आनी आपलो नाश ओडोवन घेतलो.
देवाचे परमभक्त भ्रश्ट, अहंकारी आसूंक शकता आनी तांका वर दिवपी तांचो इश्ट देवूय तांचो विनाश लागीं पावता तेन्ना तांकां वाटांवक येना ही रामायणाची त्रेतायुगांतली शिकवण आयज कलियुगांतूय अहंकारी भक्त, सत्ताधीशांक लागू पडटा.
भक्त जेन्ना सत्ताधीशाक देवाचो अवतार मानपाक लागतात तेन्ना ताचो अहंकार प्रमाणा भायर वाडून आपूण आसल्यार सगळें शक्य आसा आनी आपूण एकलोच सगळ्यांचेर भारी म्हणत राजकी विरोधकांक किंकोत मानपाक लागता. तो सैमाक देखून उणे लेखून आव्हान दिवपाक फाटीं सरना. दर्याच्या एका ल्हानशा कुडक्यार पूल बांदून ताच्या उक्तावणा दिसा दर्याक आव्हान दित ताचीं ल्हारां चिरून विकास सादपाची भाशा उलोवपाक लागता. मानव निर्मित तांत्रिक संरचनेचे अल्पशा वेळेंत भूयकांप, त्सुनामी आनी वादळां कितें करपाक शकतात तें हालींच्या तेंपार जपान आनी हाईटी देशांत आमी पळयलां.
विरोधकांक कमजोर मानप न्ही हो मरणासन्न रावणाचो तिसरो उपदेश ह्या सत्ताधीशांनी समजून घेवप गरजेचें. रावण राक्षस आसलो तरी दातांचे सुळके, माथ्याक शिंगा अशी राक्षसां बद्दल जी संकल्पना प्रचलित आसा तसो दिसनाशिल्लो. सादारण मनशां भशेन दिसतालो.
त्रेतायुगांत राक्षसी वृत्तीचो रावण जसो शिवभक्त आशिल्लो तशे कलियुगांत रामभक्त म्हूण वावुरपी राक्षसी वृत्तीचे नेते, राजकारणी आनी तांची फाटराखण करपी रामभक्त म्हणोवन घेवपी कार्यकर्ते, अनुयायी आमचे मदीं आसात. महिला कुस्तीगीरांचो लिंगीक छळ करपी सांसद, महिलेक बंगल्यार व्हरून लैंगीक आगळीक करपी आमदार ह्या आरोपी असुरांक लोकप्रतिनिधी म्हूण वेंचून दिवपीय स्वताक रामभक्त मानतात. राम- रहिम ज्याच्या नांवांत राम आसा तो रावण हे न्यायालयांत सिद्ध जालां, पूण रामभक्त सरकार ताका म्हयने, दोन म्हयन्यां खातीर सुटी दिवन अपुरबायेन बंदखणींतल्यान भायर हाडटा. रामभक्त सरकारान अकरा रावणांक बंदखणींतल्यान कायमचे भायर हाडिल्ले. तांकां परतून बंदखणीत पावोवन न्यायसंस्थेन आपले हद्दींत रामराज्य आसा हाची जनतेक जाणीव करून दिली.
दसऱ्या दिसा रावणाची प्रतिमा लासपी राजकारणी होवूय, त्या रावणा इतलोच अहंकारी, बुद्धीभ्रश्ट, नितीभ्रश्ट आसूंक शकता हें आमीं पळयतात. रावणाची अवाढव्य तण- कोंडें, लाकडांची प्रतिमा व्हड हर्श- उल्हासांत लासून ‘वायट प्रवृत्तींचेर सद्प्रवृत्तींचें जैत’ अशें आड्डत भक्तगण एकमेकांक परबीं दित नाचतात तें दसऱ्याक हांव जेन्ना पळयतां तेन्ना तांचे सरभोंवतणी वावुरपी हाडां- मांसाचे रावण तांचे नजरेक कशे काय पडनात, हाचें भोव अजाप दिसता.
लोकप्रतिनिधी, मंत्री, लेखक, गायक, कलाकार आनी समाजांतल्या विभिन्न क्षेत्रात वावुरप्यांनी ते यशाच्या प्रकाशझोता खाला पावतात तेन्ना तांचेर रावणाची सांवळी पडची न्हय म्हूण सादूर रावपाची चड गरज आसता.
दीपक लाड
पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
