भांगरभूंय | प्रतिनिधी
भारतांत अशीं कितलीशींच प्राचीन देवळां आसात, जांचो संबंद एक तर दुसऱ्या युगा कडेन आसा वा तांचो इतिहास हजारांनी वर्सां पोरणो आसा. अशेंच एक देवूळ म्हणल्यार मुरुडेश्वर. हें देवूळ कर्नाटकांतल्या कन्नड जिल्ह्यांतल्या भटकल म्हालांत आसा. ताच्या तिनूय वटांनी अरबी दर्या आसा. दर्यादेगेर आसिल्ल्यान ह्या देवळाच्या भोंवतणचो वाठार पळोवपाक खुबूच सोबीत दिसता.
मुरुडेश्वर देवूळ शंकराक समर्पीत आसा. मुरुडेश्वर हें शंकराचेंच एक नांव. ह्या देवळाची खाशेली गजाल म्हणल्यार ह्या देवळाच्या वाठारांत शंकराची एक व्हड मूर्त उबारल्या. ती संवसारांतली दुसऱ्या नंबरा वयली सगळ्यांत व्हड शंकराची मूर्त अशें मानतात. हे मुर्तीची उंचाय सुमार 123 फूट आसा. दीसभर ताचेर सुर्याचीं किर्णां पडटलीं, अशे पद्दतीन ती उबारल्या. दीसभर सूर्याचीं किर्णां पडिल्ल्यान दीसभर ती मूर्त चकचकता. ती घडोवपाक सुमार दोन वर्सांचो काळ लागलो. ही मूर्त करपाक 5 कोटी रुपया खर्च आयला. हें देवूळ पळोवपाक फकत देशांतलेच न्हय जाल्यार विदेशांतल्यान लेगीत व्हड संख्येन पर्यटक येतात.
मुरुडेश्वर देवळांत शंकराचें आत्मलिंगाची लेगीत स्थापना केल्या. पुराणीक कथां प्रमाण रावण जेन्ना अमरत्वाचें वरदान मेळोवचे खातीर शंकराची तपश्चर्या करतालो तेन्ना शंकरान ताचे तपश्चर्येचेर प्रसन्न जावन ताका एक शिवलींग दिलें, जाका आत्मलींग म्हणटात. शंकरान रावणाक सांगलें, जर तूं अमर जावपाक सोदता जाल्यार ह्या लिगांची लंकेंत व्हरून स्थापना कर, पूण एक गजाल मतींत दवर, जंय हें तूं दवरतलो थंयच तें स्थापन जातलें.
शंकराच्या सांगण्या प्रमाण रावण शिवलींग घेवन लंके वटेन वतालो, पूण वाटेरूच ताणें तें जमनीर दवरलें. उपरांत तें थंयच घट जालें. हें पळोवन रावण खुबळ्ळो आनी ताणें शिवलींग नश्ट करपाचो यत्न केलो. हे मजगतीं, ज्या लुगटान शिवलींग धांपिल्लें तें म्रिदेश्वराच्या कन्दुका पर्वताचेर वचून पडलें. म्रिदेश्वराकूच आतां मुरुडेश्वर ह्या नांवान वळखतात. शीव पुराणांत हे कथेचें खोलायेन वर्णन मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
