भांगरभूंय | प्रतिनिधी
मडगाव: रावणफोंड सर्कला लागसार रस्तो खणून घाणयारें उदक व्हरपी पायप लायनी खातीर जमनी पोंदच्यान टांकयो बांदल्यात. ह्याच वाठारांत शेनवारा सकाळीं दुचाकी वता आसतना अचकीत रस्तो मुंगरलो आनी दुचाकी स्पीड ब्रेकराक वचून आपटली. कामगारांक म्हायती मेळ्ळे बरोबर रस्तो दुरुस्त केलो.
मडगांव आनी लागसारच्या वाठारांत घाणयाऱ्या उदकाचे वाहिनी खातीर रस्ते खणल्यात. रावणफोंड सर्कल लागसार मडगांव रेल्वे स्टेशनाचेर वचपी रस्त्याचेर घाणयारें उदक सांठोवपा खातीर जमनीपोंदा टांकी बांदल्या. हे टांकयेंतलें उदक पंप करून शिरवाडे प्रकल्पांत व्हरतात. हें काम जावन आतां तीन म्हयने जाले तरी लेगीत तें अजून सुरू जावंक नात.
शेनवारा सकाळीं एक दुचाकीवालो मडगांवचे दिकेन वचपा खातीर सर्कल कडल्यान वळलो तेन्ना अचकीत रस्तो मुंगरलो आनी फोंडकुल पडलें. हाका लागून दुचाकी चलोवप्याचो ताबो गेलो. दुटाकीचेर एक बायल ल्हान भुरग्या वांगडा बशिल्ली. गाडी पडटना बायलेन भुरग्याक घट्ट धरून दवरले. हाका लागून कोणाक दुखापत जावंक ना, पूण दुचाकीचे लुकसाण जालें. हाचे उपरांत सर्कल लागसारच्या लोकांनी रावणफोंड सर्कलाचे वटेन दवरिल्लीं बॅरिकेड ओडून रस्तो बंद केलो. हे घडणुकेची म्हायती मेळ्ळे बरोबर कामगार थंय पावले आनी सध्या सिमीटाचो वापर करून रस्तो दुरुस्त करपाचें काम करतात. खणिल्ल्या वाठारांनी परत फोंडकुलां तयार जावपाची शक्यताय वाडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
