भांगरभूंय | प्रतिनिधी
मडगांवः रावणफोंडच्या नव्या पुलाच्या कामाचो नियाळ घेतलो. हें काम 31 मार्च मेरेन पुराय करपाचे निर्देश दिल्यात. नवो पूल पुराय जाले उपरांत पोरणो पूल मोडून पुलाच्या दुसऱ्या टप्प्याचें काम सुरु जातले अशी म्हायती भौशीक बांदकाम मंत्री दिगंबर कामत हांणी दिली.
मडगांवां जाल्ले एके कार्यावळी उपरांत पत्रकारां कडेन उलयतना तांणी रावणफोंड पुलाचे उदरगती विशीं म्हायती दिली. सुरवेक ह्या जाग्यार स लेन पूल बांदपाची येवजण आशिल्ली, पूण आतां चार लेन पूल बांदपाचें काम सुरू आसा. हें काम फाटली जायतीं वर्सां प्रलंबीत आशिल्लें, पूण फाटल्या वर्सा सावन मंत्री कामत हांच्या फॉलोअपाक लागून ह्या कामाक गती मेळ्ळ्या. सध्या चालू आशिल्ल्या दोन लेन पुलाचें काम निमाण्या पांवड्यार आसा, आनी पयलो टप्पो 31 मार्च मेरेन येरादारी खातीर उक्तो करपाचो हेत आसा. हाचे खातीर संबंदीत अधिकाऱ्यांक आनी कंत्राटदारांक स्पश्ट सुचोवण्यो दिल्यात.
पुलाचो पयलो टप्पो पुराय जातकच पोरन्या पुलाचेर आशिल्ल्यो उदकाच्यो लायनी आनी वीज केबल दुसरे सुवातेर व्हरतले. ते उपरांत पोरणो पूल मोडून उरिल्ल्या दोन लेन पुलाचें काम सुरू जातलें. येरादारींत कसली आडखळ जावची न्हय हे खातीर ह्या चार लेन पुलाचें काम टप्प्या टप्प्यान करपाची येवजण आसा.
मजगतीं, आर्लेमचो फ्लायओव्हर मारुती मंदिरा लागसार सकयल देंवतलो. फुडाराक येरादारीची गरज आनी नव्या बायपासाचेर वाडपी येरादारी लक्षांत घेवन हो फ्लायओव्हर सरळ रावणफोंड पुला मेरेन वाडोवपाचो प्रस्ताव राज्य सरकारान केंद्रीय रस्तो येरादारी मंत्रालयाक धाडला. हाचे भायर मडगांव शारांतल्या ‘विद्या विकास मंडळ’ शिक्षणीक संकुलां लागसारच्यान येरादारी वेस्टर्न बायपासाक जोडपाचोय प्रस्ताव मंत्री कामत हांणी मांडला. हो नवो रस्तो पुराय जातकच खारेबांध आनी कोंब वाठारांतल्या येरादारीची गर्दी उणी जावपाक व्हड मजत जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
