भांगरभूंय | प्रतिनिधी
मडगांवः राय सोनारवाडोच्या गोल्डन चाळींत भाड्यान रावपी खगेश्वर साबर (38, रा. जुनागड, ओडिशा) हाचो खून जाल्लो. ह्या प्रकरणांत म्हायती मेळ्ळ्या उपरांत 12 वरां भितर मायणा कुडटरी पुलिसांनी पळून वचपाचे तयारेत आशिल्ल्या मूळ ओडिशाच्या सशिबंत बिभीषण मांझी (43) आनी रबी मांझी (28) ह्या दुबावितांक अटक केल्या.
मेळिल्ले म्हायती प्रमाण, खगेश्वर साबर ओडिशाच्या साशिबंत मांझी आनी रबी मांझीच्या ह्या वळखीच्या वांगडा सोनारवाड्यार बिराडाक रावतालो. 13 एप्रीलाक सकाळीं शेजाऱ्यांनी खगेश्वर साबराच्या कुडींतल्यान रगत भायर सरता तें पळोवन पुलिसांक आपयलें. उपरांत खगेश्वराचो खून जाल्ल्याचें कळ्ळें. मायणा कुडटरी पुलिसांनी ई साक्ष अॅपाच्या मजतीन पंचनामो केलो. तशेंच पुरावे एकठांय करपा खातीर फॉरेन्सिक आनी वास काडपी सुण्याच्या पंगडाक आपयलें. उपरांत कुडींत भितर सरिल्लो एक ताचे वांगडी घडणुके आदीं भायर सरलो अशें कळ्ळें. हे ऑनलायन बेटिंग करताले. तेन्ना सोऱ्याचे घुंवळेत झगडी जाली आनी खगेश्वर साबराचे तकलेर दांडो मारिल्ल्यान ताका मरण आयलें.
पुलिसांनी तीन पंगड तयार करून मडगांव रेल्वे स्टेशन, कदंब बस स्टँण्ड आनी हेर वाठारांनी चवकशी करपाक सुरवात केली. आपल्या मूळ गांवाक वचपाची तयारी करपी दुबावीत साशिबंत मांझीक मडगांव रेल्वे स्टेशनाचेर भोंवतना ताब्यांत घेतलो. उपरांत बशींतल्यान गांवाक चपाचे तयारेत आशिल्लो रबी मांझीक बांबोळे वाठारांत ताब्यांत घेतलो. दोगांय दुबावितांक अटक करून पुलीस कोठयेत दवरल्यात. घडणुकेची म्हायती मेळ्ळ्या उपरांत फकत 12 वरां भितर पुलीस निरिक्षक अरुण गावस देसाय हांच्या मार्गदर्शना खाला ह्या प्रकरणांतल्या दुबावितांक अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
