भांगरभूंय | प्रतिनिधी
मडगांव : राय ग्रामसभेंत नागरिकांनी राज्या भायल्या लोकांचो आंकडो वाडिल्ल्यान सुरक्षिततायेचो प्रस्न निर्माण जाल्ल्याचें सांगलें. हाचेर पंचायती वतीन गांवांत रावपी बिगर गोंयकार नागरिकांचें सर्वेक्षण करून म्हायतीचें संकलन करपाचो थाराव घेतलो.
राय पंचायतीची ग्रामसभा सरपंच जासिंटा डायस हांचे अध्यक्षते खाला घेतली. हे ग्रामसभेंत नागरिकां कडल्यान गांवांत विवीध राज्यांतल्यान कामानिमतान आयिल्ल्या लोकांचो आनी कामगारांचो आंकडो वाडला. पुलीस बिराडाक रावप्यांचें व्हॅरीफिकेशन करता. मात पंचायती कडेन कसलेच तरेची म्हायती ना. हाका लागून थळाव्यांचे सुरक्षीततायेचो प्रस्न निर्माण जावपाक शकता. हाचेर पंचायती वतीन गांवांत बिराडाक रावपी आनी तात्पुरत्या स्वरुपांतूय रावपी गांवां भायलया सगल्या नागरिकांचें सर्वेक्षण करचें आनी तांची म्हायती पंचायतीकडेन घेवची, असो थाराव घेतलो.
सरपंच जासिंटा डायस हांणी सांगलें, गांवांतल्या लोकांनी मागणी केल्ले प्रमाण पर राज्यांतल्यान आयिल्ल्या लोकांची म्हायती पंचायतीकडेनूय जमा करतले.
तशेंच ह्या वेळार गांवांतल्या वोल्या कोयराचो प्रस्न लोकांनी मांडलो. सुको कोयराचो संकलन करता, तशेंच वोल्या कयराचें संकलन करपाची मागणी केली. ते खातर गरजेची प्रक्रिया केंद्र उभारणी करची वा एजन्सीची नेमणूक करपाच्यो सुचवण्यो केल्यो. हाचेर पंचायत वांगड्यांचे बसकेंत वोल्या कोयराच्या मुद्दयार चर्चा करुन निर्णय घेतले अशें स्पश्ट केलें.
बांधकाम अर्ज ग्रामसभे मुखार मांडपाचो थाराव
राय गांवांत खुबश्या जाणां कडल्यान बांदकामां खातीर अर्ज पंचायती कडेन करतात. पंचायत वांगड्यांचे बसकेंत चर्चा करुन कांय फावटीं बांदकामांक परवानगी दिता. हाका लागून बांदकामां खातीर कसलेय तरेचो अर्ज पंचायतीकडेन आयल्यार ताची म्हायती ग्रामसभेंत दिवची. ग्रामसभेचे मंजुरी उपरांतूच ना हरकत दाखलो दिवचो, अशी मागणी ग्रामस्थांनी केली आनी ते प्रमाण पंचायती वतीन थाराव घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
