भांगरभूंय | प्रतिनिधी
12 वरां भितर दुबावीत मायणा कुडटरी पुलिसांचे तावडेंत
भांगरभूंय । प्रतिनिधी
मडगांव : राय सोनारवाड्या वयल्या गोल्डन चाळींत बिराडाक रावपी खगेश्वर साबर (38. रा. जुनागड, ओडिशा) हाचो खून जाल्लो. ह्या प्रकरणाची म्हायती मेळत सावन 12 वर्सां भितर मायणा कुडटरी पुलिसांनी पळपाचे तयारेंत आशिल्लो मूळ ओडिशांतलो दुबावीत सशिबंत बिभीषण मांझी (43) आनी रबी मांझी (28) हाका अटक केलो.
मेळिल्ले म्हायती प्रमाण खगेश्वर साबर हो आडिशाचो वळखीचो सशिबंत मांझी आनी रबी मांधी हांचे वांगडा सोमारवाडो राय वाठारांत बिराडाक रावतालो. 13 एप्रीलाक सकाळीं खगेश्वर साबर हाचे कुडींतल्यान रगत भायर येता तें शेजाऱ्यांक दिसलें. तांणी ही म्हायती पुलिशेक दिली. ते उपरांत खगेश्वर हाचो खून जाल्ल्याचें कळ्ळें. मायणा कुडटरी पुलिसांनी ई साक्ष अॅपाच्या आदारान पंचनामो केलो. वास काडपी सुण्याच्या पंगडा सयत फॉरेन्सीक पंगडाक लेगीत आपोवन पुरावे एकठांय केले. ते उपरांत कुडींत आशिल्लो एक सांगाती घडणुकेच्या आदींच भायर गेल्ल्याचें कळ्ळें.
हे कामगार पैजी लायताले. तातूंत सोऱ्याचे घुंवळेंत मारबडयचो प्रकार घडलो आनी त्या वेळार तकलेर लांकडाचो दांडो मारिल्ल्यान खगेश्वर साबर हो जखमी जालो आनी ताका मरण आयलें, अशी म्हायती मेळिल्ली.
मायणा कुडटरी पुलिसांनी तीन पंगड स्थापन करून मडगांव रेल्वे स्टेशन, कदंब बसस्टॅण्ड आनी हेर वाठारांत तपासाक सुरवात केली. आपल्या मूळ गांवांत वचपाचे तयारेंत आशिल्लो दुबावीत सशिबंत मांझी हाका मडगांव रेल्वे स्टेशनाच्या वाठारांत भोंवतना ताब्यांत घेतलो. ते उपरांत रबी मांझी हो बशींतल्यान आपल्या मूळ गांवांत वचपाचे तयारेंत आसतना बांबोळी वाठारांतल्यान ताका ताब्यांत घेतलो. दोनूय दुबावितांक अटक करून तांकां कोठडेंत धाडले. म्हायती मेळत सावन फक्त 12 वरां भितर पुलीस निरिक्षक अरूण गांवस देसाय हांच्या मार्गदर्शना खाला मायणा कुडटरी पुलिसांनी ह्या प्रकरणांतल्या दुबावितांक अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
