भांगरभूंय | प्रतिनिधी
मडगांव : रायच्या उपसरपंचांचेर अविस्वास थाराव दाखल केल्लो. ताचे उपरांत घेतिल्ले वेंचणुके वेळार मॅन्युअल रॉड्रिग्ज हांचो एकूच अर्ज आयिल्ल्यान तांची विरोधा विणें निवड जाली. सरपंचान राजिनामो दिल्ल्यान सध्या राय पंचायतीचेर प्रशासकाची नेमणूक केल्ली.
साश्टींतल्यान व्हडल्या ग्रामपंचायतीं मदली राय गांवांतली सरपंच आनी उपसरपंच पदां एकदांच रितीं जाले उपरांत सरकार नियुक्त केल्ल्या अधिकार्यां कडल्यान तात्पुरतें प्रशासन चलयतालें. संचालक सिद्धी हळर्णकार हांच्या आदेशान पंचायत संचालनालयान पंचायतीच्या कामाचेर देखरेख करपा खातीर धाकलू घाडी हांची प्रशासक म्हणून नियुक्ती केल्ली.
ह्यान पयलीं उपसरपंच ओस्वाल्ड डिसोझा हांचे आड स पंचायत वांगड्यांच्या गटान येसस्वीपणान अविस्वास थाराव हाडिल्लो. हो प्रस्ताव हालींच मंजूर केलो. उपरांत सरपंच मारियो डिसोझा हांणी राजीनामो दिलो. हाका लागून दोनूय पदां रितीं उरलीं. रोखडोच पर्याय उपलब्ध नाशिल्ल्यान पंचायत संचालनालयान हस्तक्षेप करीत प्रशासकाची नेमणूक केल्ली.
सोमारा उपसरपंच पदा खातीर वेंचणुकेचें आयोजन केल्लें. हे वेंचणुके वेळार पंचायतीच्या ११ वांगड्यां मदले स पंच वांगडी हजर आशिल्ले. जाल्यार विरोधी पांच पंच वांगडी हजर रावूंक ना. उपसरपंच पदा खातीर मॅन्युअल रॉड्रिग्ज हांचो एकूच अर्ज वेंचणूक अधिकार्यांकडेन दाखल जाल्लो. ते प्रमाण मॅन्युअल हांची उपसरपंच पदार निवड केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
