भांगरभूंय | प्रतिनिधी
भांगरभूंय । प्रतिनिधी
पणजीः पणजी म्हानगरपालिकेचे हद्दींत येवपी रायबंदरच्या वाठारांत सद्या स्मार्ट सिटी प्रकल्पा खातीर मल निस्सारण लायन घालपाचें काम चल्लां. ते खातीर पोरणे गोंय- रायबंदरचो पोरणो रस्तो पन्नास दिसां खातीर बंद केला. व्हो अशीर रस्तो दोनूय वटेन खणल्ल्यान रायबंदरकारांक घरांतल्यान भायर सरून खंय वचपाक मेळना. चडशे रायबंदरकार आपल्या घरांत अडून पडल्यात. ह्या स्मार्ट सिटीच्या त्रासांतल्यान केन्नाकाय भायर सरीन अशें तांकां जालां.
पणजेसावन पोरण्या गोंय- सांपेद्र रायबंदरचो पुराय रस्तो बंद केला आनी येरादारी कंदब बायपासावयल्यान घुंवडायल्या. मल निस्सारण कामांक लागून रायबंदरचो मुखेल आनी अंतर्गत रस्ते जायते कडेन खणून उडयला. रस्ते खूब अशीर आशिल्ल्यान तांचेर पयली येरादारीच कोयंडी जाताली. आतां ते खणल्ल्यान रस्तेच दिसनात. रायबंदरच्या लोकांक आपलीं चार चाकी वाहनां घरा दवरपाची पाळी आयल्या. खंयूय वचपाचें जाल्यार दुकाची घेवन वतले जाल्यार फोडील्ल्या रस्त्यां वयल्यान तांकां सर्कस करून त्यो घेवंन वच्च्यो पडटात.
पणजे वचपाचें जाल्यार तांकां कदंब बायपासायवल्यान वचून फार्तपेंच्यान गोंय लागी करचें पडता. रायबंदरचो रस्तो मार्च 10 ते एप्रिल 30 मेरेन 50 दीस स्मार्ट सिटीच्या कामांखातीर बंद केला. मल निस्सारणाचे काम कासवाचे गतीन चल्ला आनी कसलेच नियोजन दिश्टी पडना. ते भायर येरादारी कंदब बायपास रस्त्या वयल्यान घुंवडायल्यान चिंबला जंक्शनार येरादारीची कोंयडी जाता. हे अवतिकायेक लागून रायबंदरचो श्रेयस कामत केळकार हांनी ति़डक उक्तायला. रस्तो पुराय आडोवन दवरला. दुचाकी घेवन वचपा खातीर आमका पास दिल्यात. आमच्यो गाडयो चार पूण पास तीनच. रायबंदरचो दोनय वटेन रस्तो खणला
देखून आमका कदंब पठारावयल्यान व्हडले वल्त मारून पणजे वयचे पडता, अशे केळकार हाणे सांगलें.
रस्तो बंद आशिल्ल्यान कोणांक किदें जाल्यार आमकां घऱा कडेन अॅम्बुलन्स घेवंन वचपाक मेळना. सामक्या गरजेच्या वेळार चार चाकी वाहनां भायर काडपाक मेळनान. रायबंदरकाराचें पासियेंश सामकें काबार जाला. केन्ना 31 एप्रील येतलो आनी आमचो स्मार्ट सिटी वनवास काबार जातलो हाचे वाटेकडेन रायबंदरकार दोळे लावंन बसल्यात.
नियोजन नाशिल्लें काम
रायबंदर वाठारांत स्मार्ट सिटीचें काम हातांत घेवचे पयलीं सारकें नियोजन करपाक जाय आशिल्लें. तशें केल्लें जाल्यार पणजे वचपाक एके वटेनचो रस्तो लोकांक वापरपाक मेळटाशिल्लो. कसलेंच नियोज ना. कामाचेर कोणाचीच देखरेख ना. सुपरव्हायजन न्हिदला. खणल्ल्या रस्त्यांत उदक भरलां. थंय बॅरीकेड घातली ना. रस्तो कितलो खोल खणला हाचो अदमास लेगीत येना. तातूंत पडून मनश्याचो जीव वचपाक शकता, अशें श्रेयस कामत येळेकार ह्या थळाव्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
