भांगरभूंय | प्रतिनिधी
मडगांव : राय ग्रामसभेंत थळाव्या लोकांनी सुरक्षेच्या दिश्टीकोनांतल्यान बिगर गोंयकारांची वाडटे संख्येचेर हुस्को उक्तायलो. कांय दिसां आदीं खुनाची घडणूक घडिल्ल्यान थळाव्या लोकांचे सुरक्षेचो प्रस्न मांडलो. ते प्रमाण पंचांनी दर प्रभागांतल्या बिगर गोंयकारांची वळख पटोवन म्हायती घेवची आनी पुलिसां कडेनूय पडटाळणी करपाची मागणी करपाचें थारायलें.
राय ग्रामसभा आयतारा जाली. ग्रामसभे उपरांत सरपंच मारियो हांणी सांगलें, राय मनोरा वाठारांत रस्त्याचें हॉटमिक्सींग केलां. मात ह्या रस्त्याच्या गटाराचें काम करूंक ना. ताका लागून हो रस्तो व्हांवून वचपाची शक्यताय आसा. तें काम तत्काळ हातांत घेवचें. तशेंच मनोरा वाठारांत पावसाचें उदक सांचता, ताचो त्रास थळाव्या लोकांक जाता, हो मुद्दो चर्चेक आयलो. हाचेर बांदकाम विभागा कडल्यान निविदा काडल्या, तें काम फाटपुरवण करून पुराय करपाचें आस्वासन पंचांनी दिलें. बिगर गोंयकारांचे संख्येचो आनी लोकांचे सुरक्षेचो प्रस्न गंभीर आशिल्ल्याचो मुद्दो मॅन्युएल बार्बोधा हांणी मांडिल्लो. गांवांत दिसान दीस दुसऱ्या राज्यांतल्यान येवपी लोकांची संख्या वाडल्या. गांवांतल्या खंयच्या वाठारांत, कितल्या कुडींनी बिगर गोंयकार रावतात, तांच्या कागदपत्रां सयत म्हायती पंचायती कडल्यान एकठांय करची. लोक जाय तश्यो कुडी बांदतात आनी बिराडाक दितात. दिसाचे दोगूच आसतात, पूण रातीं वेळार थंय खूब जाण येतात, अशेंय दिसून येता. रातच्या वेळार तांचो वावर थळाव्या लोकां खातीर असुरक्षा निर्माण करपी आसा, अशें तांणी सांगलें.
मारियो डिसोझा हांणी दिलो सरपंचपदाचो राजिनामो
मारियो डिसोझा हांणी सरपंचपदाचो राजिनामो दिला. डिसोझा हांणी सांगलें, सरपंच म्हूण काम करतना खूबशीं उदरगतीचीं कामां केलीं. फुटबॉल मैदान, हॉलेची देखभाल, गांवांत हायमास्ट उबारपा सयत मॉन्सूनपूर्व कामां खातीर खूबश्यो फायली आडावन दवरून आडखळी हाडपाचे यत्न चलिल्ल्यान आपणे राजिनामो दिला, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
