भांगरभूंय | प्रतिनिधी
भांगरभूंय । प्रतिनिधी
पोरणे गोंयः अयोध्येंतल्या राम मूर्ती प्रतिश्ठापना निमतान डोंगरी- मंडुर हांगच्य शश्टी शांतादुर्गा देवळाच्या मैदानार 17000 दिवे पटोवन श्रीरामाची प्रतिमा तयार करून बिरेस्तारा रातीं दीपोत्सव मनयलो. व्हो अपूर्व देखावो पळोवपाक डोंगरी, मंडूर, आझोशी आनी सरभोंवतणच्या वाठारांतल्या लोकांनी गर्दी केल्ली. सान्त आंद्रेचो आमदार विरेश बोरकार, मंडूरचो सरपंच प्रशांत नायक, पंच वांगडी, वेगवेगळ्या देवस्थान समित्यांचे वांगडी आनी गांवच्या लोकांनी दीपोत्सवाची सगली तयारी केल्ली.
दिव्यांचो वापर करून श्रीरामाची प्रतिमा तयार करपाच्या डोंगरीच्या तरणाट्यांचे प्रतिभेची आमदार बोरकार हाणे तुस्त केली. राम मूर्ती प्रतिश्ठापनेच्या सुवाळ्याचो एक वांटो म्हणून व्हो दीपोत्सव आयोजीत केल्लो अशें ताणे सांगलें. दिव्यांनी श्रीराम प्रतिमा तयार करपाक आमकां तीन दीस लागले अशें सरपंच प्रशांत नायकान सांगलें. हे काम करपाक आमका गांवच्या लोकांनी बरो प्रतिसाद दिलो. राम मूर्ती प्रतिश्ठापने निमतान आमी आनीकूय कार्यावळी आयोजीत केल्या अशें ताणे सांगलें.
शुक्रराक डोगरी- मंडूर वाठारांतल्या देवळांनी रामनाम जप जालो. आयतार 22 जानेवारीक शोभायात्रा काडटले आनी अयोध्येंतल्या राम मूर्ती प्रतिश्ठापना सुवाळ्याचे व्हडल्या स्किनीं वरवीं थेट प्रक्षेपण करतले अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
