भांगरभूंय | प्रतिनिधी
फरीदाबाद, खबरां संस्था: हरियाणांतल्या फरीदाबादांत अटक केल्लो आतंकवादी अब्दुल रहमान (१९) हो अयोध्येंतल्या राम मंदिराचेर हँड ग्रेनेडान हल्लो करपाचो कट रचतालो. तो फैजाबादच्यान फरिदाबादाक फकत हँड ग्रेनेड हाडपा खातीर आयिल्लो. ताका परत येवन हल्लो करपाचो आशिल्लो. तो हें सगळें काम पाकिस्तानी गुप्तचर संस्था आयएसआयचे सुचवणे प्रमाण करतालो. आयएसआयच्या हँडलरान ताका हँड ग्रेनेडूय दिल्लें. तो बदलिल्ल्या नांवान फरिदाबादांत रावतालो, अशें पुलिसांनी सांगलें.
ताचे पयलीं आयतारा सांजेवेळार डीआयजी सुनील जोशी आनी डीएसपी एसएल चौधरी हांच्या नेतृत्वा खाला गुजरात एटीएस आनी फरिदाबाद एसटीएफच्या पंगडान ताका अटक केली. हातूंत, इंटेलिजेंस ब्युरो कडल्यान मेळिल्ले म्हायतीनूय तांकां मजत केली. जेन्ना ताका धरलो तेन्ना ताचे कडेन २ हँड ग्रेनेडूय आशिल्ले. अटक केल्लो अब्दुल रहमान हो उत्तर प्रदेशांतल्या फैजाबाद जिल्ह्यांतल्या मिल्कीपूर हांगा रावपी. तो थंय मटनाचें दुकान चलयता.
गुजरात एटीएसानूय तो राम मंदिरा पसून १० किमी अंतराचेर रावतालो हाची चवकशी केली. ताच्या घराचेर छापो घालून खुबश्यो दुबाव येवपा सारक्यो गजाली जप्त केल्यो. ताचे कडेन ट्रेनीची तिकेटूय मेळ्ळ्या. तो दिल्लींतल्या कोणाच्या तरी संपर्कांत आशिल्लो.
पुलिसांच्या म्हणण्या प्रमाण, जेन्ना अब्दुल रहमानाक धरलो तेन्ना ताचे कडेन दोन हँड ग्रेनेड आशिल्ले. छापो घालतना अब्दुलान थंयच्यान पळून वचपाचो यत्न केल्लो. मात पुलीस पंगडान ताका धरलो. तशें, हँड ग्रेनेडचो स्फोट जावचो न्हय म्हणून, बॉम्ब निकामी करपाच्या पंगडाक आपयलो. ह्या वेळार खंयचोच सामान्य मनीस लागीं येवचो न्हय, म्हणून पुराय वाठाराक घेराव घालो. उपरांत हँड ग्रेनेड निकामी केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
