रामा काणकोणकार हांचेर जीवघेणो हल्लो

भांगरभूंय | प्रतिनिधी

सांताक्रूझांतले गुन्यांवकारी टोळये कडेन हल्लेखोरांचो संबंद

भांगरभूंय । प्रतिनिधी

पणजी : समाज कार्यकर्ते रामा काणकोणकार हांचेर बिरेस्तारा 18 सप्टेंबराक दनपारां करंजाळे वाठारांत स जाणांनी जीवघेणो हल्लो केलो. ह्या हल्ल्यांतलो दुबावीत सांताक्रूझच्या एका खाप्या गुन्यांवकारी टोळये कडेन संबंदीत आशिल्ल्याचो मुळावो अदमास पुलिसांनी उक्तायला आनी तपास सुरू केला. शुक्रारा सकाळ मेरेन दुबावितांक ताब्यांत घेवचे खातीर पुलिसांनी चार पंगडा वरवीं सोद मोहीम हातांत घेतल्या.

ह्या प्रकरणांत सोयरू वेळीप हांणी कागाळ दाखल केल्या. ते प्रमाण वेळीप आनी रामा करंजाळे दनपारां जेवपाक गेल्ले. त्या वेळार अज्ञात स जाणांनी रामा काणकोणकार हाका कुशीक व्हरून तांचेर हल्लो केलो. त्या वेळार हल्लेखोरांनी मारपेट करचे खातीर रामाच्या तोंडाक शेण सारयलें. ते उपरांत ताका ‘गोंयचो राखणदार जावपाक जाय?’ अशें विचारून येथिश्ट बडयलो. ते खातीर हल्लेखोरांनी केबलाचो वापर केलो.

रामा काणकोणकार हांकां चाकू आनी एकल्यान पिस्तूल दाखोवन मारपेट केल्ल्याची म्हायती तांणी दिली. तशेंच हल्लेखोर सांताक्रूझ वाठारांतले आसात. ते  एका खाप्या गुन्यांवकारा कडेन संबंदीत आसा. तातूंतल्या एकल्यान हे आदीं रामा हांचेर हल्लो केल्लो. तोवूय ह्या हल्ल्यांत वांटेकार आशिल्ल्याचो दावो तांणी केलो.

ते उपरांत घडणूक घडले उपरांत घडणुकेचे सुवातेर खूबशे लोक जमा जाले. रामा हे जखमी अवस्थेंत रस्त्याचेर पडिल्ले. ते उपरांत ताका बांबोळेच्या जीएमसींत व्हेलो. ताका 110 नंबराच्या वॉर्डांत भरती केला. ताची स्थिती नाजूक आशिल्ल्यान दोतोरांनी ताचो जबाब घेवपाक पुलिसांक मनाय केली.

ह्या हल्ल्याची म्हायती मेळटाच पुलीस घडणुकेचे सुवातेर दाखल जाले. हे संबंदांत रितसर कागाळ केले उपरांत उत्तर गोंय पुलीस अधिक्षक राहुल गुप्ता आनी उपअधिक्षक सुदेश नायक हांच्या मार्गदर्शना खाला निरिक्षक विजयकुमार चोडणकार हांच्या फुडारपणा खाला उपनिरिक्षक मंजुनाथ नायक हांणी गुन्यांव दाखल करून तपास सुरू केला. ह्या हल्ल्याच्या प्रकरणांतले दुबावीत सांताक्रूझच्या एका खाप्या गुन्यांवकारा कडेन संबंदीत आशिल्ल्याचें प्रथमदर्शनी मुखार आयलां. ते प्रमाण पुलिसांनी चार पंगड तयार करून ताचो सोद घेवपाक सुरवात केल्या. पुलिसांनी घडणुकेचे सुवाते वयल्यान हल्लो करपा खातीर वापरिल्लो कॅबल आनी हेर वस्तू जप्त केल्यात. मजगतीं चाकू आनी पिस्तूल अजून पुलिसांक मेळूंक ना. मजगतीं, हो प्रकार घडणुकेचे सुवाते वयले सीसीटीव्हींत कैद जाला. हल्लेखोरांनी घडणुकेचो व्हिडियो काडून मोबायलाचेर कोणाक तरी धाडिल्ल्याचें सीसीटीव्हींत दिसता.