भांगरभूंय | प्रतिनिधी
हल्ल्यांतल्या ‘मास्टरमायंडा’क सोदपाची मागणी
भांगरभूंय । प्रतिनिधी
पणजी : समाज कार्यकर्ते रामा काणकोणकार हाका शेनवारा जीएमसींतल्यान डिस्चार्ज दिला. ह्या वेळार ताणें प्रसार माध्यमां कडेन संवाद सादलो. आपल्याचेर जाल्लो हल्लो हो वैयक्तीक कारणांक लागून जावंकना. हाचे फाटल्यान मास्टरमायंड कोण आसात ताचो तपास पुलिसांनी करचो. फाटले कांय म्हयने आपल्या वांगडा चालू आशिल्ले प्रकार पळयत जाल्यार ह्या हल्ल्या फाटल्यान दोन मंत्री आसात, अशें दिसता असो दुबाव ताणें उक्तायला. पुलिसांक हल्ल्या विशीं म्हायती आशिल्ल्याचो आरोप लेगीत ताणें केलो.
रामा हाणें सांगलें, आपूण गोंयच्या बऱ्या खातीर आवाज काडटा, हेच खातीर आपल्याचेर हल्लो केलो. हल्लो करप्यांनी आपल्याक गावडो, राखणदार अशीं उतरां वापरलीं. आपल्या तोंडांचेर, तकलेचेर मुठी मारल्यो. आपूण घुंवळ येवन पडलो तेन्ना आपल्या तोंडांत शेण घातलें. तुका गोंयचो राखणदार जावपाक जाय, आमच्या आमदाराचें नांव पेड्डेर करता व्हय, तुका एसटी पोर्टफोलियो जाय काय कितें, असे प्रस्न विचारीत ते आपल्याक बडयताले. पुलिसांनी 2 ऑक्टोबराक आपलो जबाब नोंद केला. ह्या वेळार सुमार तीन वरां आपणे जबाब दिलो. जबाब व्हिडियो रेकॉर्डींग स्वरुपांत लेगीत केला. मात अजून तो आमकां दिवंक ना. जबाबांत आपल्याक कोणे मारबडय केल्या, हल्लेखोर कितें म्हणटाले, हल्लो कसो जालो, हाची म्हायती दिल्या. हल्लेखोरांचो आनी आपली वैयक्तीक दुस्मानकाय ना अशेंय आपणे पुलिसांक सांगलां. आपल्याचेर जाल्लो हल्लो हो स म्हयन्यांचें नियोजन करून जाला आसतलो अशें आपल्याक दिसता, अशेंय ताणें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
