भांगरभूंय | प्रतिनिधी
हे टिव्ही माळे उपरांत खंयच्याच निर्मात्यान म्हाका काम दिलें ना. कामा खातीर खंयच्याय निर्मात्या कडेन वतालों तेन्ना तो म्हाका म्हणटालो, ‘तूं भगवान राम. तुजी प्रतिमा चड व्हडली आसा, देखून आमी तुका दुय्यम भुमिका दिवंक शकनात. 14 वर्सां हांव बेकार उरलों.’
रामानंद सागर हांची ‘रामायण’ ही माळ 1987 वर्सा दूरदर्शनाचेर प्रक्षेपीत जाली. देशभर तिका उपाट लोकप्रियता मेळ्ळी. ती चालू जातकच देशांतलें 75 टक्के कामकाज अक्षरशा ठप्प जातालें. सगले लोक टीव्ही मुखार बसून रामायण पळयताले. प्रेक्षक आयज लेगीत हे माळेंतल्या कलाकारांक देव मानतात.
‘रामायणा’चें पयलेच खेपे दूरदर्शनाचेर 25 जानेवारी 1987 दिसा प्रक्षेपण जालें आनी निमाणो भाग 31 जुलय 1988 दिसा दाखयलो. अभिनेतो अरुण गोविलान रामाचें पात्र साकार केल्लें. आतां मेरेन ताका ते प्रतिमेंतल्यान भायर सरूंक मेळूंक ना. 34 वर्सां उपरांत लेगीत गोविलाक ‘टीव्हीचो राम’ म्हणून वळखतात.
अरुण गोविलाची अभिनेतो जावपाची इत्सा नासली. ताका वेवसायीक जावपाचें आशिल्लें. तें खातीर तो मुंबय पावलो. एके मुलाखती वेळार अरुणान स्वता सांगिल्लें की टीव्ही माळ लोकप्रीय जातकच प्रत्यक्षांत लोक ताका भगवान राम मानपाक लागले. तो खंय वतालो थंय ताका पळोवन पांयांक हात लावपाक लागताले. ‘रामायण’ पळयतना लेगीन भोवसंख्य भारतीय न्हावन धुवन टिव्ही मुखार बसताले, धूप, उजवाती लेगीत दाखयताले. आयतार आसून लेगीत बरेच लोक ते दीस शिवराक जेवताले. ताका असल्याच तरेच्या भुमिकां खातीर ऑफरी येताल्यो, देखून ताणीं अभिनया पसून पयस रावपाचें थारायलें.
आंतरराश्टीय मळार लोकप्रीय जाल्ल्या टीव्ही वयल्या रामाचो म्हणल्यार अरुण गोविल हाचो जल्म 12 जानेवारी 1958 दिसा उत्तर प्रदेशांतल्या रामनगर (मेरठ) हांगा जालो. मेरठ विद्यापिठांत शिकता आसतना ताणें कांय नाटकांनी काम केलें. ताचें किशोरवयीन जिवीत सहारनपूरांत गेलें. अरुणाच्या बापायक ताणें सरकारी नोकरी करची अशें दिसतालें, पूण अरुणाचें मनांत अशें कितें तरी करचें दिसतालें,
जें लोकांक सदां खातीर याद उरतलें. ह्याच कारणाक लागून तो वेवसाय करपाचें सपन घेवन मुंबय आयलो. पूण उपरांत अभिनयाचो मार्ग वेंचलो. ताका व्हडल्या पडद्याचेर पयलो ब्रेक 1977 वर्सा ताराचंद बडजात्याच्या ‘पहेली’ फिल्मांत मेळ्ळो. उपरांत ‘सावन को आने दो’ (1979), ‘सांच को आंच नहीं’ (1979), ‘इतनी सी बात’ (1981), ‘हिम्मतवाला’ (1983), ‘दिलवाला’ (1986), बॉलिवूड फिल्मांनी म्हत्वाच्यो भुमिका मेळ्ळ्यो.
रामानंद सागर हाणीं ‘विक्रम और बेताल’ हे माळेंत राजा विक्रमादित्याची भुमिका अरुण गोविलाक पयली दिली. ताच्या येसा उपरांत 1987 वर्सा ‘रामायण’ माळेंत ताणीं रामाची भुमिका केली. अरुणान ‘लव कुश’ (1989), ‘कैसे कहूँ’ (2001), ‘बुद्ध’ (1996), ‘अपराजिता’, ‘वोह हुए ना हमारे’, ‘प्यार की कश्ती में ’ ह्या सारक्या जायत्या दूरदर्शन माळांनी अभिनय केला .
एक फावट तमिळ, हिंदी सिनेमाचें चित्रीकरण चालू आसतना ताका सिगरेट फुसकावपाची लुव आयली. त्या वेळार तो चेन स्मोकर आशिल्लो, देखून थंय कोनशाक वचून सिगरेट ओडपाक लागलो. तेन्ना थंय एक तामिळ मनीस सामकार येवन तमिळांत आड्डून कितें तरी म्हणपाक लागलो. तेन्ना अरुणान लागीं उबो आशिल्ल्या दुसऱ्या मनशाक विचारलें, ‘तो मनीस म्हाका कितें म्हणटा?’ मागीर अरुणाक कळ्ळें की तो मनीस ताचो फॅन. त्या मनशाक राग आयिल्लो. आमी तुका देव मानतात आनी तूं सिगरेट फुसकायता’? अशें तो म्हणटालो. हे घडणुके उपरांत अरुण गोविलान फुडें केन्नाच सिगरेटीक हात लायलो ना. खुद्द अरुण गोविलान कपिल शर्मा शो कार्यावळींत हो किस्सो सांगिल्लो.
आठ भांवडां मदीं (6 पूत आनी दोन धुवो) अरुण चवथो. ताचे बायलेचें नांव श्रीलेखा गोविल. अरुण आनी श्रीलेखा हांकां दोन भुरगीं आसात. पुताचें नांव अमल आनी चलयेचें सोनिका.
‘रामायण’ माळेक लागून कलाकारांक जितली लोकप्रियता मेळ्ळी तितलेंच कलाकारांचें लुकसाण जालें. कारण, उपरांत सुमार 14 वर्सां अरुण गोविलाक काम मेळ्ळें ना. देखून पडद्याचेर आशिल्ल्या रामाक वास्तव जिणेंत खरो वनवास भोगचो पडलो. 2020 वर्सा लॉकडावनाच्या काळांत परतून दूरदर्शनाचेर ‘रामायण’ दाखयलें. मजा म्हणल्यार ही माळ परतून एक फावट लोकप्रीय जाली. कलाकार लेगीत परत एक फावट लायमलायटांत आयले.
रामायणाचो पुराय पंगड ‘द कपिल शर्मा शो’ कार्यावळीत दिसलो. ह्या प्रसंगाचेर रामायणाच्या लोकप्रियते उपरांत काम मेळप कशें कठीण जालें तें अरुण गोविलान सांगलें. ‘एक अभिनेतो म्हूण हांवें म्हजी कारकीर्द सिनेमांतल्यान सुरू केली. पूण कांय काळा उपरांत हांव ल्हान पडद्याचेर स्थलांतरीत जालो. रामानंद सागर हाणीं म्हाका रामाची भुमिका दिली. ती मेळ्ळी म्हूण खूब खोस जाली. हे भुमिकेन म्हाका जिणेंत खूब कितें दिलां. देशभरांत म्हजी वळख जाली. हांव रातयां स्टार जालो. देशांतलेच न्हय तर हेर देशांतल्यानय म्हाका रसिक पत्रां धाडटाले. पूण, हे टिव्ही माळे उपरांत खंयच्याच निर्मात्यान म्हाका काम दिलें ना. कामा खातीर खंयच्याय निर्मात्या कडेन वतालों तेन्ना तो म्हाका म्हणटालो, तूं भगवान राम. तुजी प्रतिमा चड व्हडली आसा, देखून आमी तुका दुय्यम भुमिका दिवंक शकनात. कांय दिसांनी ही परिस्थिती बदलली अशें म्हाका दिसलें. पूण, अशें जालें ना. सुमार 14 वर्सां हांव कामाक लागून भोंवतालो. पूण, म्हाका तें मेळ्ळें ना.’
– सुदिन वि. कुर्डीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
