भांगरभूंय | प्रतिनिधी
ठाणे, खबरां संस्था ः ज्या इंग्रजांनी 200 वर्सां आमचेर राज्य केले त्या इंग्रजांक रामभक्तांक लागून भारतान फाटीं घाल्यात आनी भारत संवसारांतली पांचवी व्हड अर्थवेवस्था जाल्या. फुडल्या पांच वर्सांत ही अर्थवेवस्था संवसारांत तिसरे सुवातेर पावतली. त्या वेळार नरेंद्र मोदी तिसरे खेपे प्रधानमंत्री आसतले, अशें केंद्रीय मंत्री अनुराग ठाकुर हांणी सांगलें.
ठाणेच्या सरस्वती विद्यालयाच्या आवारांत मंगळारा सावन 38 वी रामभाऊ म्हाळगी व्याख्यानमाला सुरवात जाल्या. तिचें उक्तावण मंत्री ठाकुर हांणी केलें. ह्या वेळार ते उलयताले.
2014 वर्सा भारताची अर्थवेवस्था धाव्या क्रमांकार आशिल्ली. पूण, फाटल्या कांय वर्सां भितर रामभक्तांक लागून भारत पांचवी व्हड अर्थवेवस्था जाल्या. फुडल्या पांच वर्सांत भारत संवसारांतली तिसरी व्हड अर्थवेवस्था जातली. तेन्ना प्रधानमंत्री नरेंद्र मोदी तिसरे खेपे प्रधानमंत्री आसतले, अशें मंत्री ठाकुरान सांगलें.
भारत हो सनातन देश. खूब यत्न करून पसून मुघल आनी इंग्रजांक सनातन धर्माचो नाश करपाक मेळ्ळो ना. फुडाराकूय सनातन धर्म शाश्वत उरतलो. कोरोनाच्या काळांत अर्थवेवस्था देंवली आनी कोट्यांनी लोक मरताले अशें सगल्यांनी म्हणिल्लें. पूण रामभक्त प्रधानमंत्री नरेंद्र मोदीक लागून कोरोनाच्या काळांत वासीन तयार जालें. मोदीजीन देशांत 220 कोटी वासिना फुकट दिवन वयल्यान 157 देशांक तें उपलब्ध करून दिलें. 80 कोटी लोकांक फुकट अन्नधान्य दिवन फुडल्या पांच वर्सां खातीर तांणी फुकट अन्नधान्याची हमी दिल्या. हीच खरी राश्ट्रीय पुजा अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
