भांगरभूंय | प्रतिनिधी
गोंय विद्यापीठ परतून एक फावट वादाच्या भोंवऱ्यांत घुंवपाक लागलां. निमित्त जालां, कुलगुरुंची एका दिसाळ्यांत आयिल्ली मुलाखत. हरशी देंवत आशिल्ल्या रेंकिंगाक लागून विद्यापीठ अदीं मदीं गाजताच, पूण हो नवो वाद निर्माण जाला, तो गोंय विद्यापिठाचें रेंकिंग हें राबितो दाखल्याक लागून देंवलां, ह्या वक्तव्याक लागून. म्हणल्यार राज्या भायल्या गुणेस्त प्राध्यापकांक राबितो दाखल्याचे अटीक लागून घेवपाक मेळना. हाचो दुसरो अर्थ, गोंयकार प्राध्यापकांचो दर्जो तितलोसो बरो ना, म्हणून रेंकिंग देंवता. ही मुलाखत उजवाडाक येतकच विरोधी पक्ष तिडकल्यात. तांणी कुलगुरुंचेर कारवाय करपाची मागणी केल्या. हें प्रकरण मुखार वता काय तें आसा थंयच पोल जाता तें कांय दिसांनी दिसतलेंच.
आरजीपीच्या मतान, कुलगुरून राबित्या दाखल्या विशीं मत उक्तायलां, तें ती अट रद्द जावची म्हूण. म्हणटकच तांकां म्हत्वाच्या पदांचेर राज्या भायल्या उमेदवारांक घेवपाक मेळटलें. गोंयकार प्राध्यापक मेळचे नात, अशे विशय ते विद्यापिठांत हाडपाक सोदतात. तांणी रेंकिंग देंवपाक थळाव्या प्राध्यापकांक जापसालदार धरप, हो गोंयकारांचो अपमान, अशें स्पश्ट करून आरजीन तांच्या माफीची मागणी केल्या. दुसरे वटेन गोवा फाॅरवर्डान कुलगुरुंक पदा वयल्यान काडचे अशें मागलां. कुलगुरुंचे मुलाखतींतल्यो बऱ्योच गजाली फट, असोय तांचो दावो.
गोंयांत गुणेस्त प्राध्यापक नात, हें कुलगुरू खंयच्या आदाराचेर म्हणटात तें कळना. शिक्षणाच्या मळार बऱ्याच गोंयकारांचें नांव जालां. स्पर्धा परिक्षांनी हेर राज्यांचे तुळेन गोंयकार फाटीं आसत, मात ते शिक्षणाचे बाबतींत हुशार नात, उच्च पदां खातीर लायक नात, असो दुबाव घेवप चुकीचें.
विद्यापिठांतल्या गोंयकार प्राध्यापकांचे सोदनिबंध, संशोधन राष्ट्रीय पांवड्या वयल्या साबार नेमाळ्यांनी उजवाडाक आयलां. मात परप्रांतीय प्राध्यापकांनी एकादो आडवाद सोडल्यार हो वावर करूंक ना, असो गोवा फाॅरवर्डाचो दावो. विद्यापिठाचें हाचेर कितें म्हणणें? उच्च शिक्षण खात्या कडल्यान काॅलेजींनी कार्यावळी, प्रकल्प चालीक लावन ते विद्यापिठाचे अशें नॅक पंगडाक दाखोवपाचो कुलगुरुंचो यत्न आसा, असो गंभीर आरोपूय फाॅरवर्डान केलो. तोय विद्यापिठाक खोडून काडचो पडटलो. 59 टक्के कॅम्पस प्लेसमेंट जाल्यात अशें कुलगुरून म्हणलां. मात ते खंय काॅलेजींनी नोकरेक लागल्यात. मुलाखतींत सांगल्या ती दिश्टावो कार्यावळ खंय उच्च शिक्षण विभागाची. ती विद्यापिठांत चित्रीत जाली म्हूण विद्यापिठाची जाता? गोंय विद्यापिठांत भायल्यांक घेवपाक सोदतात, असो आरोप विरोधी पक्षांनी केला. विद्यापिठान आपल्या सगल्या कर्मचाऱ्यांची वळेरी जाहीर केल्यार सत्य कळटलें. कोणा कर्मचाऱ्यांक काडल्यात, नाका म्हणलां, जाल्यार तांचींय नांवां सांगचीं. म्हणटकच ताचेरूय उजवाड पडटलो.
गोवा फाॅरवर्डान एके कार्यावळीचो उल्लेख पत्रकार परिशदेंत केला. थर्ड डिग्री अशें तिचें नांव. तातूंत खंय विद्यापिठाच्या विद्यार्थ्यांक अंडरवियरीचेर परेड करपाक लायिल्ली. ह्या वेळार प्रेक्षकांत चलयो हाजीर आशिल्ल्यो खंय. आतां कसलीय गजाल मोबायल फोनाचेर बंदिस्त जाता आनी मागीर सोशल मिडियाचेर व्हायरल जाता. हे थर्ड डिग्री कार्यावळीचो व्हिडियो कोणा कडेन तरी आसतलोच. ह्या प्रकाराची विद्यापिठा खाला चवकशी चलता अशेंय गोवा फाॅरवर्ड म्हणटा. जाणें हे कार्यावळीची कल्पना सुचयली, ताका पयलीं पुलिसांनी ताब्यांत घेवंक जाय. ही कार्यावळ जर खऱ्यांनीच जाल्या, जाल्यार ती उक्तडार ना येवपा फाटलें कारण कितें? फाटीं एका प्राध्यापकान पेपर चोरिल्ले म्हूण बोवाळ जाल्लो. त्या प्रकरणाचें कितें जालें? श्यामाप्रसाद मैदान गोंय विद्यापिठाचे मालकेचें अशे म्हणटात, तें खरें? साबार प्रस्न आसात.
गोंय विद्यापिठाचें एनआयआरएफ रेंकिंग सध्या 150 – 200 मदीं आसा. तें वयर व्हरपाचो यत्न जावंक जाय. कायम वादांत रावन कांयच साध्य जावचें ना. शिक्षण हें पवित्र मळ. थंय वशिलेबाजी, गैरप्रकार, ‘गांवपण’ नाका.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
