भांगरभूंय | प्रतिनिधी
‘द सॉल्ट एव्हिएशन’ आनी ‘टाटा अॅडव्हान्स सिस्टिम लिमिटेड’ कंपनी कडेन कबलात
नवी दिल्ली, खबरां संस्था ः फ्रांसांतल्या ‘दसॉल्ट एव्हिएशन’ आनी ‘टाटा अॅडव्हान्स सिस्टिम लिमिटेड’ कंपनीन मंगळारा भारतांत राफेल विमानाचो मुखेल सांगाडो म्हणल्यार ‘विमानधडा’ चे (फ्युसलाज) भारतात उत्पादन करपा खातीर एक म्हत्वाची कबलात केल्या. म्हत्वाचें म्हणल्यार फ्रांसा भायर राफेल विमानधडा तयार करपाची ही पयलीच खेपेची गजाल.
‘टीएएसएल’ न दिल्ले म्हायती प्रमाण, दसॉल्ट कंपनी कडेन विमानधडाच्या उत्पादना खातीर वट्ट चार कबलाती जाल्यात. हाका लागून देशी विमान तयार करपाची तांक वाडटली. हाचे खाला हैदराबादांत कारखानो स्थापन जातलो आनी 2028 वर्सा सावन थंय उत्पादन सुरू जातलें. सुरवेक वर्साक दोन विमानधडा तयार करपाचें लक्ष्य आसा. भारतीय लश्करां खातीर राफेल विमानां विकतीं घेवपाची कबलात जाल्या आनी तातूंतली कांय विमानां भारतांत तयार जातली. हे संबंदीं दोनूय देशांच्या सरकारां आनी कंपनीं मदीं पयलींच कबलाती जाल्यात. पूण बिरेस्तारा जाल्ल्या कबलातीक लागून पयलेच खेपे ह्या विमानांतलो एक सामको म्हत्वाचो घटक फ्रांसा भायर म्हणल्यार भारतांत तयार करप शक्य जातलें.
सगळ्यांत म्हत्वाचें घटक
० विमानांचें धड हो सगळ्यांत म्हत्वाचो घटक. दंडगोल (सिलिंडर) आकाराच्या ह्या पत्राच्या व्हडल्या सागाड्यांत आसन वेवस्था वा म्हाल सांठोवपाची वेवस्था गरजे प्रमाण करतात.
० गरजे प्रमाण धडाचे आकार वेगवेगळे आसतात आनी ताचेर दार, जनेलां आदीय मांडावळ केल्ली आसता.
० अपघात जाल्यार ह्या सांगाड्याक लागून इंजिनाची आनी प्रवाशांची राखण करता देखून तो घटमूट आसचो पडटा. देखून खंयच्याय विमान बांदकामांत विमान धड हो एक म्हत्वाचो घटक मानतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
