राफा

भांगरभूंय | प्रतिनिधी

ताची मोख एकूच आसली. फकत फामादीक टॅनिस खेळगडो जावप. टॉनी सारको भरवंशाचो नदालाक आनीक बरो प्रशिक्षक मेळचो ना. हें ताका खबर आशिल्लें.

हाे एक जुंवो जावन आसा मायोरका. स्पेनाचे उदेंत दर्या देगे सावन सुमार दोनशें पंचवीस किलोमिटर अंतराचेर. भूंय मदल्या दर्यांत. हांगां जिवीत खूब मंद गतींत चलता. जुंव्या भोंवतणी कसलीच धांवपळ ना. लोक एकामेकांचे लागीं भारी संतोसान जीण सारतात. ह्या जुंव्याचेर मानाकोर नांवाचो एक गांव वसला. थंयचे लोक फुटबॉल मोगी. नामनेचे फुटबॉल खेळगडो मान्युएल नदाल मानाकोराच्या खेळां क्लबांत वावुरतालो. स्पेनाच्या राश्ट्रीय पंगडांत तो खेळ्ळा. ताचो मदलो भाव टॉनी नदाल लॉन टॅनिसाचो खेळगडो आशिल्लो. ताणेंच भुरग्यांक टॅनिस शिकोवपाक सुरवात केल्ली.
1989 तली खबर. कोर्टार टॉनीच्या व्हडल्या भावाचो तीन वर्सांचो पूत राफायल आयलो. घरांतलीं सगळीं ताका राफा म्हणटालीं. टॉनीक हेर भुरगीं आनी राफा मदीं खूब फरक जाणवलो. जेन्ना टॉनी ‘सर्व’ वा ‘रिर्टन’ करतालो, तेन्ना हेर भुरगीं बॉल आपल्या कडेन येवपाची वाट पळयतालीं. आनीक मागीर शॉर्ट खेळटालीं. पूण राफा बॉल येवपाची वाट पळयत राव नाशिल्लो. दर एका शॉर्ट खातीर तो स्वता बॉला कडेन धांवतालो. टॉनीन ही गजाल तांच्या आवय-बापायक सांगली. आतां राफा फुटबॉलाच्या वांगडाच टॅनिसय खेळपाक लागलो.
राफा लाडा- मोगान वाडिल्लो. घरांतलीं सगळीं मनश्यां ताची अपुरबाय करतालीं. तो आशिल्लोच तसो. तरीय लेगीत तो मात्सो भिजूड. सामकोच सोंश्याच्या काळजाचो. टॅनिस कोर्टाचेर टॉनी नदालाचे लागीं खूब कडक वावुरतालो. घडये ताका मनान बळिश्ट करूंक सोदतालो आसुंये.
केन्ना – केन्नाय राफा खेळून जायते फावटीं घरा परतताना रडटालो, ही गजाल राफाचे आवय खबर आशिल्ली. पूण ती ताच्या खेळाचे भितर मेंतेर जाली ना. आनीक राफानय केन्नाच टॉनीचे विशीं कागाळ केली ना. घडये शिस्त आनी प्रशिक्षण अशेच तरेन जाता, हें ताका कळिल्लें जावं येता. टॉनी राफाचेर ध्यान पारखुवपाक आनी थीर करपाक बॉल शेंवटितालो. चुकल्यार ताचेर तापोवणीचो शिंवोर घालतालो. इतलेंय आसून लेगीत केन्नाच बेजारलो ना. राफा टॅनिसाचो सराव करपाक व्यस्त उरलो. ताची मोख एकूच आसली. फकत फामादीक टॅनिस खेळगडो जावप. टॉनी सारको भरवंशाचो नदालाक आनीक बरो प्रशिक्षक मेळचो ना. हें ताका खबर आशिल्लें.
कांय वर्सां खेळ्ळ्या उपरांत राफालान आपल्या परस व्हडल्या खेळगड्यांक मातेये भरवण केले. व्हड सर्तीं जिखपाक सुरवात केली. पिरायेच्या बाराव्या वर्सां राफान स्पेनाचे राश्ट्रीय अंडर- 14 टॅनिस सर्तींत वांटो घेतलो. पयल्याच मॅचींत तो हारलो. उपरांत ताच्या उजव्या हाताचें मदलें बोट तुटलें. पूण राफा खेळत रावलो. तो फायनलींत मेरेन पावलो. आनी ते सर्तींत जैतिवंत थारलो. मागीर ताका आपल्या बोटांतल्या दुखण्याचो विचार जालो. ताची बोटाची वेदना खूब खर आशिल्ली. निमाणें आपणें जिखिल्ली ट्रॉफी लेगीत उखलपाक ताका मेळ्ळी ना.
पिरायेच्या चवदाव्या वर्सा राफा वेवसायीक खेळगडो जालो. दरेक रॅली (जेन्ना एका पॉयंटा खातीर चार वा चड शॉट खेळटात.), दरेक पॉयंटांचेर आपली सगळी शक्त ओंपपी असो खेळगडो अजून मेरेन कोणेंच पळोवंक ना.
2003 वर्सा राफान टॅनिसांत येस मेळोवंक सुरवाक केली. तेन्ना खेळा मळार रॉजर फेडरराचो शेक आशिल्लो. जायते जाण ताका अजून मेरेनचो सर्वश्रेश्ट खेळगडो मानतात. राफा आनी रॉजर हांच्या मदल्या मॅचींनी एके वटेन फेडरराची सहजताय दिसताली. जाल्यार दुसरे वटेन नदालाच्या झुजाची भावना. फेडरर आनी नदाल हांणी मागीर कांय वर्सां उपरांत नोवाक जोकोविच हांच्या मॅचींनी जायत्या जाणांक टॅनिसाचे कडेन जोडले.
टॉनी नदाल हांच्या देखरेखी खाला राफान सोळा ग्रॅन्ड स्लॅम खिताब जिखले. मागीर आदलो टॅनिस खेळगडो कार्लोस मोया हांचे वांगडा आनीक स खिताब. राफालान टॅनिसाच्या महान खेळगड्यां मदीं आपलें नांव कोरांतिल्लें. हो तोच भिजूड भुरगो आशिल्लो तो मात्सो खर रावल्यार रडटालो. ह्यो सगळ्यो ताच्यो गजाली राफाच्या ‘मि इस्टोरिया’ (इंग्लीशींत ‘माय स्टॉरी’ ) ह्या आत्मचरित्रांत नोंद जाल्यात.
पस्तीस वर्सांत राफान टॅनिस बॉलाचेर शेक गाजयलो. दोन दसकां वेवसायीक टॅनिसांत नरेत्रा वरीं चमकलो. पिरायेच्या 38 वर्सांचेर निवृत्ती घेतली. जीणभर भोंवून सगळो संवसार जिखून घेतलो. आतां तो आपल्या गांवात मानाकोर गांवात परतला. खेळाच्या खळबळांतल्यान पयस, आपल्या घराब्याच्या वांगडा खोशयेचें आनी मोगाचें जिवीत जगपाक. ताच्याच शांतीच्या जुंव्याचेर…

विशाल सिनाय खांडेपारकार
9850465365