भांगरभूंय | प्रतिनिधी
काणकोण : भुंयगत वीज केबल घालप, केरी सारकिल्ल्या वाठारांत वीज आनी रस्तो व्हरपाच्या कामांक तशेंच पंचायत वाठारांतल्या विवीध उदरगतींच्या कामांक आतां मेरेन रान खात्यान आदार केला. 2014 त जेन्ना दया गांवकार सरपंच आशिल्ले तेन्ना लेगीत भुंयगत वीज केबल घालपाक रान खात्यान सगळे तरेची मजत केल्या, मात पिंपळामळ वाठारांत जर रान खातें तपासणी नाको घालपाक सोदता जाल्यार आमी ताका खर विरोध करतले, संघर्श करतले अशी शिटकावणी खोतीगांवचे आदले सरपंच तशेंच सध्याचे पंच आनंदू देसाय हांणी पत्रकार परिशदेंत सांगलें.
पिंपळामळ वाठारांत रान खातें बांदकाम करता. तें बांदकाम बंद करचें अश्या आशयाचें निवेदन खोतीगांवच्या जागरूक लोकांनी खोतीगांव पंचायत, काणकोणचे उपजिल्होधिकारी आनी हेरांक दिल्लें. त्या बांदकामा संबंदांत काणकोणचे आमदार तशेंच सभापती रमेश तवडकार हांचेर गरजे भायर आरोप जातात. ते आरोप खोडून काडचे खातीर ही पत्रकार परिशद घेतिल्ली. ह्या वेळार खोतीगावंची सरपंच वृंदा वेळीप, उपसरपंच पुनम गांवकार, पैंगीण पंचायतीची सरपंच सविता तवडकार, पंच जयेश गांवकार, कृष्णा गांवकार, दत्ता वेळीप, अशोक गांवकार, श्रीस्थळची सरपंच सेजल गांवकार, सभापतीचे ओ.एस.डी संतोष लोलयेकार उपस्थीत आशिल्ले.
सरपंच वृंदा वेळीप हांणी सांगलें, खोतीगांव जागरूक समितीन एक निवेदन पंचायतीक सादर केल्लें. त्या निवेदना संबंदांत निवेदन करपी आनी रान अधिकाऱ्यांची जोडबसका आपयल्ली. मात हे बसकेक गजानन गांवकार सोडल्यार दुसरो कोणूच हाजीर रावूंक नाशिल्लो. पिंपळामळ वाठारांतल्या बांदकामा संबंदांत रान खात्यान पंचायतीची परवानगी घेतल्या? असो प्रस्न पत्रकारांनी ओएसडी संतोष लोलयेंकार हांणी सांगलें, सरकाराच्या उदरगतीच्या कामां संबंदांत कांय कामांक पंचायतीचे परवानगेची गरज ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
