भांगरभूंय | प्रतिनिधी
44 वर्सांत पयलेच खेपे जाली वेंचणूक
खबरां संस्था
कोलंबोः श्रीलंकेंत नव्या राष्ट्रपतीपदा खातीर वेंचणूक जाली. हे वेंचणुकेंत श्रीलंकेचे काळजीवाहू राष्ट्रपती रानील विक्रमसिंघे वेंचून आयल्यात. फाटल्या 44 वर्सांत पयलेच खेपे श्रीलंकेच्या संसदेंत राष्ट्रपतीपदा खातीर वेंचणूक घेतली.
काळजीवाहू राष्ट्रपती रानील विक्रमसिंघे हांचे खेरीत दुल्लस अल्हप्पारूमा आनी अनुरा कुमारा दिसानायके हे राष्ट्रपतीपदाच्या वेंचणूक रिंगणांत आशिल्ले. 225 वांगडी आसपी श्रीलंकेच्या संसदेंत भोवमत मेळोवपाक 113 मतांची गरज आशिल्ली. रानील विक्रमसिंघे हांकां 134 मतां मेळून स्पश्ट भोवमत मेळ्ळें.
श्रीलंकेचे राष्ट्रपती गोताबया राजपक्षे हांणी 14 जुलय दिसा आपल्या पदाचो राजिनामो दिल्लो. ते खातीर तेन्नाचे प्रधानमंत्री रानील विक्रमसिंघे हांणी काळजीवाहू राष्ट्रपती म्हूण पदभार स्विकारिल्लो.
मजगतीं, श्रीलंकेची अर्थवेवस्था सांबाळपांत सरकाराक अपेस आयिल्ल्यान तांचे आड जनआक्रोश निर्माण जाल्लो. परिणामी राजपक्षे हांचेर देश सोडून पळपाचो वेळ आयलो. ते उपरांत आतां गोताबया हांचे सुवातेर नवे राष्ट्रपती म्हूण रानील विक्रमसिंघे वेंचून आयल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
