रानांत वाट चुकिल्लो मनीस 10 दीस उदक पियेवन जिवो उरलो

भांगरभूंय | प्रतिनिधी

कॅलिफोर्निया, खबरां संस्था ः धा दीस दोंगरांत बेपत्ता जाल्लो मनीस अमेरिकेंतल्या कॅलिफोर्नियांत सांपडलो. अमेरिकन खबरां चॅनल सीएनएनच्या म्हणण्या प्रमाण, 34 वर्सां पिरायेचो लुकास मॅकक्लिश 11 जूनाक सांताक्रूझ पर्वतांत हाइकिंगाक गेल्लो. दोंगर पळोवपाच्या सोदांत तो 3 वरां चललो. परत येवपाची इत्सा जाली तेन्ना तो रानांत वाट चुकलो.
मॅकक्लिशा कडेन कांय बेरी आनी सुमार 4 लिटर उदक आशिल्लें. ते खातीर तो 10 दीस जिवो उरलो. कॅलिफोर्निया पुलिसांनी दिल्ले म्हायती प्रमाण बिरेस्तारा एका ड्रोनाक मॅक्क्लिश रानांत मदीं मेळ्ळो. तो चिखलान लोळिल्लो आनी सामको दुबळो अवस्थेंत मेळ्ळो. कुटुंबाच्या म्हणण्या प्रमाण तांणी पयलीं मॅकक्लिशचो सोद ताच्या घरा लागसार घेतलो पूण पांच दिसांनी 16 जून दिसा फादर डे दिसा तो मेळूंक नाशिल्ल्यान थळाव्या पुलिशेंत तो बेपत्ता जाल्ल्याची कागाळ दाखल केली.
उपरांत पुलिसांनी लुकास मॅकक्लिशाक सोदपा खातीर 300 जाणांची खाशेली बचाव मोहीम सुरु केली. तांका सोदपा खातीर पुलिसांनी आनी रान खात्यान ड्रोनाच्या आदारान 2600 चौखण किलोमीटर रानांत सोद घेतलो.

मॅकक्लिश रानाच्या मदीं मेळ्ळो
बचाव कार्यात मजत करपी कॅल फायर सॅन माटेओन सांगलें, रानांतल्या मदल्या वाठारांत मजती खातीर मॅकक्लिशच्या आड्डपाचो आवाज जायते फावटीं आयकूंक आयलो. पूण कांय वेळा उपरांत तो थांबतालो, देखून तांकां गोंदळ जातालो. अमेरिकन खबरां चॅनल एबीसी कडेन दिल्ले मुलाखतींत मॅक्क्लिशनान सांगलें, हांवेन फकत एक जोडी पँट, शूज आनी टोपी घालून 10 दीस रानांतल्या हवामाना कडेन झूज केली. उदक एकठांय करून पांयतणांचो आदार घेवन पियेतालो अशें तांणी सांगलें. हाका लागून तो जिवो उरलो.

उज्याक लागून रस्तो चुकलो
कांय काळा पयलीं रानांत उजो लागलो ते खातीर ताची वाट चुकली अशें मॅकक्लिशान सांगलें. सध्या तो थकवाचो त्रास सोंसता. तशेंच कुडींत दुखप जाता. तशेंच दोनूय हात आनी खांद्यार जखम जाल्यात. आतां तो कांय काळ रानांत वचचो ना.