रानांत पार्क केल्ल्या मोटारींतल्यान 52 किल भांगर आनी 11 कोटी जप्त
भांगरभूंय | प्रतिनिधी
भोपाळ, खबरां संस्था ः आयकर विभागान भोपाळच्या मेंदोरी रानांत बेवारस अवस्थेंत पार्क केल्ले मोटारींतल्यान 52 किल भांगर तशेंच 11 कोटी रुपयांची रोख रक्कम जप्त केल्या. जप्त केल्ल्या भांगराचें मोल सुमार 40 कोटी 47 लाख रुपया आसा.
आयकर खात्यान दिल्ले म्हायती प्रमाण, रानांत एका मोटरींत रोख रक्कम आशिल्ल्याची म्हायती मेळ्ळी. हाचे उपरांत बिरेस्तार रातीं दोन वरांचे सुमाराक पंगड मेंदोरी पावलो. रानांतल्या इनोवा मोटारी लागसार सुमार शंबर पुलीस आनी 30 गाडयो पयलींच पाविल्ल्यो. घडये पुलिसांकय हे विशीं म्हायती पयलींच मेळिल्ली आसूं येता. आयकर पंगडान मोटारीची तपासणी केली तेन्ना तांकां पयशां वांगडा भांगर मेळ्ळें. इनोवा मोटार लॉक आशिल्ली. अशे परिस्थितींत आयकर अधिकाऱ्यांच्या पंगडा वांगडा आयिल्ल्या गनमॅनान गाडयेची कवची फोडली. आनी मोटारींतली एक बॅग भायर काडली. ती उगडली तेन्ना तांतूत भांगर आनी रोख रक्कम मेळ्ळी.
मजगतीं, आयकर खात्याच्या चवकशेंतल्यान ती मोटार चेतन गौराची आशिल्ल्याची म्हायती मुखार आयल्या. ह्या प्रकरणांत आयकर खात्याच्या अधिकाऱ्यांनी चेतन गौर हाची चवकशी केली तेन्ना भांगर आनी पयशे खंयच्यान आयले आनी ते कोणाचे आसात हाची म्हायती आपल्या कडेन ना अशें तांणी सांगलें. पूण आपूण आरटीओचो आदलो कॉन्स्टेबल सौरभ शर्मा हाचो इश्ट आशिल्ल्याचें तांणी मान्य केलें. लोकायुक्त पंगडान 19 डिसेंबराक सकाळीं भोपाळांतल्या अरेरा कॉलनीतल्या कॉन्स्टेबल सौरभ शर्मा हाच्या घराचेर धाड घाली. तेन्ना 1.15 कोटी रुपया रोख, अर्द किल भांगर, हिरे, भांगराच्यो वस्ती आनी सुमार 50 लाखांचेयो रुप्याच्यो मुदयो सयत मालमत्तेचे कागदपत्र जप्त केल्यात. तशेंच शर्मा हांच्या कार्यालयांतल्यान 1.70 कोटी रुपयांची रोख रक्कम सयत मालमत्तेचे कागदपत्रय जप्त केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
