भांगरभूंय | प्रतिनिधी
जैवविविधताय मंडळाची लोकां कडेन मागणी
पणजीः गोंय राज्य जैविविविधताय मंडळान पावसांत रानांतल्या रोयणींचेर उगवपी अळमीं व्हड प्रमाणांत काडची न्हय, लोकां कडेन मागणी केल्या. अळम्यांच्या जातींचो सांबाळ करपा खातीर लोकांनी रोयणींचेर पन्नास टक्के अळमीं दवरचीं. रानांत रोयणींचेर उगवपी अळमीं व्हड प्रमाणांत तोडिल्ल्यान पर्यावरणाचो समतोल इबाडटा. आयज अनेक अळम्यांच्यो जाती नश्ट जाल्ल्यो आसात. तशेंच पुराय वाड न जाल्ली, बारीक अळमीं काडिल्ल्यान फुडल्या वर्सांनी अळमीं उगोवपाचें प्रमाणूय उणें जायत वता. फुडल्या वर्सा अळमीं येवपा खातीर पुराय वाड जाल्ली अळमीं रोयणींचेर कुसपाक जाय आनी मातयेत विघटन जावपाक जाय. तशेंच अळम्यांचे बारीक कळे काडपाच्या प्रकाराक लागून रोयणींतल्या वाळटीच्या अळ्यांकय धोको निर्माण जाता आनी पर्यावरणाचो समतोल इबाडटा. पर्यावरणाचो समतोल इबाडिल्ल्यान माकड जोरा सारकें संसर्ग पातळपाचीय शक्यताय आसता.
खाजगी रान धनयांनीय आपल्या रानांतल्या रोयणींचेर उगवपी अळम्यांच्या जातींचो सांबाळ करपा खातीर यत्न करचें असोय उसो मंडळान मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
