भांगरभूंय | प्रतिनिधी
जनावरांच्या हल्ल्याची लुकसाण भरपाय वाडोवपाचो निर्णय
हल्ल्यांत अपंग जाल्यार मेळटले 7.5 लाख
पणजी: रानवटी जनावरांच्या हल्ल्यांत मरण आयल्यार आतां कुटुंबाक 10 लाखां बदला 15 लाखांची लुकसाण भरपाय मेळटली. रानां जीव मंडळाचे बसकेंत हो निर्णय जालो. मुख्यमंत्री डॉ. प्रमोद सावंत हांच्या फुडारपणा खाला रानां जीव मंडळाची बसका जाली. हे बसकेंत हो म्हत्वाचो निर्णय जालो.
रानां खात्याच्या गोपां कडल्यान ही म्हायती मेळ्ळी. हे बसकेक रानां खात्याचे मंत्री विश्वजीत राणे, गोंय रानां उदरगत म्हामंडळाच्यो अध्यक्ष देविया राणे, मुखेल सचीव डॉ. कांडावेलू आनी रानां खात्याचे अधिकारी हाजीर आशिल्ले. रानवटी जनावरांच्या हल्ल्यांत एखादो कायमस्वरुपी विकलांग वा अपंग जालो जाल्यार ताका 7.5 लाख रुपयांची मजत मेळटली. पयलीं 5 लाख रुपया मजत मेळटाली. हल्ल्यांत गंभीर दुखापत जाल्यार 2 लाखांची मजत मेळटली. हल्ल्यांत किरकोळ जखमी जाल्यार 50 हजारांची मजत मेळटली. पयलीं किरकोळ दुखापती खातीर 25 हजारांची मजत मेळटाली.
रानवटी जनावरांचो सांबाळ करपा सयत लोकांची सुरक्षा राखपाचेर बसकेंत विचार जालो, अशी म्हायती गोपांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
