भांगरभूंय | प्रतिनिधी
रान खात्या कडल्यान सुमार 40 लाख रुपयांची लुकसाण भरपाय
भांगरभूंय । प्रतिनिधी
पणजी : रान खात्यान रानवटी जनावरां कडल्यान मनशांचेर आनी पोशिल्ल्या जनावरांचेर जाल्ल्या हल्ल्याची लुकसाण भरपाय म्हूण सुमार 40 लाख रुपया दिल्यात. हातूंत 110 पोशिल्ल्या जनावरांचो आनी 4 मनशांचो आस्पाव आसा, अशी म्हायती रान खात्याच्या वरिश्ठ अधिकाऱ्यान दिली.
अधिकाऱ्यान दिल्ले म्हायती प्रमाण अन्नाच्या सोदांत रानांतल्यान लोकवस्तींनी आयिल्ल्या रानवटी जनावरां कडल्यान हे हल्ले जातात. सगल्यांत चड हल्ले पोशिल्लीं जनावरां देखीक, गायी, म्हशी आनी बोकडांचेर जाल्यात. हीं पोशिल्लीं जनावरां तांचें पोट भरपाचें साधन आसा. हे खातीर 110 पोशिल्ल्या जनावरांचेर जाल्ल्या हल्ल्यां खातीर रान खात्यान 12.87 लाख रुपयांची लुकसाण भरपाय धनयांक दिल्या.
रानवटी जनावरां कडल्यान मनशांचेर चार हल्ले जाल्यात, तातूंतल्या दोगांक मरण आयलां, जाल्यार दोग जाण जखमी जाल्ले. वारखंड- पेडण्यां रानदुकराच्या हल्ल्यांत एका मनशाक मरण आयिल्लें, जाल्यार बेतोडें फोंड्यां गव्याच्या हल्ल्यांत आनीक एका मनशाक मरण आयिल्लें. त्या दोगांच्याय घरच्यांक दरेकी 10 लाख रुपयांची लुकसाण भरपाय दिल्या.
सत्तरी सुर्ला वाठारांत बापूय आनी धुवेचेर वांस्वेलान हल्लो करून तांकां गंभीर जखमी केल्ले. हल्ल्यांत गंभीर जखमी जाल्ल्या बापायाक 4,400 रुपया जाल्यार गंभीर जखमी जाल्ले चलयेक 5 हजार रुपयांची लुकसाण भरपाय खात्यान दिल्या.
रानांत अन्नाचे स्रोत उणे जाल्ल्यान शाकाहारी जनावरां लोकवस्तींनी येतात आनी तांच्या वासान मांस खावपी जनावरां येतात. हे खातीर रान वाठारांनी वेगवेगळ्या तरांचीं फळांचीं झाडां लावपाक सुरवात केल्या, रानांनी उदकाचे कोंड बांदल्यात, रानांत चरपा खातीर थळां तयार केल्यात, रान वाठारांचे शिमेचेर फातराचें दुरीग बांदल्यात आनी लोकां खातीर 24 वरां हेल्पलायन जारी केल्या, अशी म्हायती अधिकाऱ्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
