भांगरभूंय | प्रतिनिधी
मुख्य रान संरक्षकाचें गाराणें
भारतीय रानवटी जीव संस्थेक पत्र
उपाय येवजण्यांचो खर्च दिवपाची मागणी
भांगरभूंय । प्रतिनिधी
पणजी : बिबटे, गव्यां सयत हेर रानवटी जनावरां आतां गोंयांतले लोकवस्तींत येवपाक लागल्यात. रानवटी जनावरांच्या वावराक लागून शेतां, बागायतींच्या लुकसाणीं सयत वाठारांतल्या मनशांकूय धोको निर्माण जला. ताका लागून रान खातें आनी रान खात्या अधिकाऱ्यां मुखा वयलें आव्हान दिसान दीस वाडपाक लागलां. वाडट्या मनीस आनी रानवटी जनावरांच्या संघर्शाचे फाटभुंयेर गोंयच्या रान खात्यान उपाय येवजण्यां खातीर भारतीय रानवटी जीव संस्थेक गाराणें घातलां.
अभयारण्या भायर रानवटी जनावरांचो वावर कसो उणो करपाक मेळटलो? हाचेर उपाय येवजण्यांचो आराखडो सादर करचो, अशें पत्र रान खात्यान बरयलां. गोंयचे मुख्य रान संरक्षक नवीन कुमार हांणी डेहराडूनच्या भारतीय रानवटी जीव संस्थेक हें पत्र बरयलां.
गोंयांतलीं झाडां, रान वाठार तशेंच अभयारण्यांची संख्या चड आसा. रानवटी जनावरांत अभयारण्यांतूच न्हय जाल्यार अभयारण्या भायले लोकवस्तींत येवपाक लागल्यांत. ताका लागून रानवटी जनावरां आनी मनशां मदीं संघर्श वाडला. ह्या संघर्शांत मनशां वांगडाच रानवटी जनावरां तशेंच शेतां वांगडाच साधन सुविधांचें लुकसाण जाता. हाचेर उपाय येवजण करप सध्याची गरज आसा.
अभयारण्य वा रान वाठारा भायर येवपी जनावरांचो पद्दतशीर अभ्यास जावपाक जाय. गोंयांत कसलीं कसलीं जनावरां आसात? लोकवस्तींत खंयचीं जनावरां येतात? तीं कित्याक येतात? ताच्या फाटल्या कारणांचो अभ्यास जावपाक जाय. खंयचीं जनावरां घातक आसात? हाचे फुडली धोक्याची व्याप्ती कशी आसतली? हाचोय विचार जावपाक जाय. जनावरां कडल्यान पोशिल्लीं जनावरां आनी मनशांचेर हल्लो जातनाच बंदोबस्ता खातीर रानवटी जनावरांची कास जाता. हातूंत मनीस- रानवटी जनावरां हांचे मदीं संघर्श निर्माण जाता. पर्यावरण तशेंच रानवटी जनावरांचो सांबाळ आनी संवर्धन करचे खातीर उपाय येवजण तशेंच आराखडो सादर करपाची विनवणी मुख्य रान संरक्षकान केल्या. तशेंच आराखड्याचे कार्यवाही खातीर खर्चाचो तपशील लेगीत सादर करपाक सांगलां. रानवटी जनावरांचो विचार केलो जाल्यार मुखेलपणान बिबट्यांचो वावर वाडत आसा. रातीं वागडाच दिसाचो लेगीत बिबट्याचो वावर वाडपाचे प्रकार दीसपट्टे घडटात. पेडणें म्हालांत मांद्रें, कोरगांव, हरमल, मोरजी ह्या वाठारांनी खूब खेपे बिबटो वावुरतना दिसता. बिबट्यांनी गोरवां सयत सुण्यांत लेगीत मारून खाल्यात. फक्त पेडण्यांच न्हय जाल्यार सत्तरी, दिवचल, काणकोण म्हालांत लेगीत बिबट्यांचो उपद्रव थळाव्यांक सोंसचो पडला. वाळपय- रेडीघाटी वाठारांत गव्यांनी स्कुटरचालकाचेर हल्लो करपाच्यो घडणुको घडल्यात.
रानवटी जनावरांचो उपद्रव व्हड समस्या
रानवटी जनावरांचो शेती आनी बागायतींक खूब मार बसला. सत्तरी आनी दिवचल म्हालांत केळमें आनी माडयांचें रानदुकर खूब लुकसाण करतात. माकड आनी शेकऱ्यांच्या उपद्रवाक लागून नाल्लाचेंय खूब लुकसाण जाता. हाचेर विधानसभेंत लेगीत खूब खेपे चर्चा जाल्या. कायद्याक लागून ह्या जनावरांक मारपाक लेगीत मेळना. रानवटी जनावरांचो उपद्रव हो शेतकार आनी शेतां खातीर व्हड समस्या आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
