रानवटी जनावरांची तस्करी करपी स भारतीयांक अटक
भांगरभूंय | प्रतिनिधी
बँकॉक विमानतळा वयल्यान 87 जनावरां जप्त
बँकॉक, खबरां संस्था ः थायलंडांतल्या बँकॉक विमानतळा वयल्यान 87 रानवटी जनावरांची तस्करी करपी स भारतीयांक अटक केल्या. हांतूत तांबडो पांडा आनी टमरीन माकडाचो आस्पाव आसा. खबरां प्रमाण, सगल्या आरोपींनी आपल्या सामानांत जनावरांक लिपयल्लें आनी तें बँकॉकच्यान मुंबय येताले.
तस्करीच्या वळेरेंत 29 मॉनिटर लिझर्ड, 21 सोरोप आनी पोपटां सयत 15 सुकण्यांचो आस्पाव आसा. कस्टम खात्यान दिल्ले म्हायती प्रमाण सगळ्या जनावरांक सामानांत जतनायेन लिपोवन दवरिल्ले. गुन्यांवकार थारल्यार ह्या सगळ्या आरोपींक 10 वर्सां मेरेन बंदखण वा आयात कराच्या 4 पटींनी दंड भरचो पडटलो.
हांचे आदीं फेब्रुवारींतूय बँकॉक विमानतळा वयल्यान मंगोलियन मनशाक अटक केल्ली. कोमोडो ड्रॅगन, अजगर आनी 20 जिव्या नुस्त्यांची तस्करी करपाचो यत्न केल्ल्याचो आरोप ताचेर आसा. ऑक्टोबर 2023 वर्सा एका प्रवाशान थायलंडांतल्यान 30 जनावरांची तस्करी करून तीं तैवानांत धाडली. हातूंत २८ कांसवांचो आस्पाव आशिल्लो.
जनावरांची तस्करी ही12 लाख कोटी रुपयांची बाजारपेठ
थायलंड हें रानवटी जनावरांच्या वेपाराचें मुखेल केंद्र. हांगाच्यान जनावरा चीन आनी व्हिएतनामांत तस्करी खातीर व्हरतात. पूण फाटल्या कांय वर्सांत भारतांतय जनावरांच्या वेपाराच्यो घडणुको वाडल्यात. रानवटी जनावरांची तस्करी हो संवसारांतलो चवथो व्हड बेकायदेशीर वेपार. दर वर्सा सुमार 8-12 लाख कोटींचो हो वेपार जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
