भांगरभूंय | प्रतिनिधी
भांगरभूंय । प्रतिनिधी
वाळपयः कृशी उत्पादनाची नासाडी करून उडोवपी रानवटी जनावरांचो बंदोबस्त करात अशी सरकारा कडेन मागण करून लेगीत कसलीच उपाय येवजण करूंक नाशिल्ल्यान सत्तरी तालुक्यांतले शेतकार आनी बागायतदार सध्या सामके तिडकल्यात. कृशी उत्पादन घेवपाचे कांय ना असो विचार करपाची पाळी आतां तांचेर आयल्या. रानवटी जनावरांक उपद्रवी म्हणून घोशित करपाची मागणी ते फाटल्या धा वर्सां सावन करतात आनी सरकार आस्वासना दिवपा बगर दुसरें कांयच करना.
फाटल्या धा वर्सां सावन कृशी उत्पादक रानवटी जनावरांचो त्रास सोसतात. माकड (खेतीं) गवे, शेकरू, रानदुकर केळीं, नाल्ल, सुपारी, आंबे, काजू, पेरा अश्या पिकांची नासाडी करतात. सरकारान रानवटी जनावरांचो बंदोबस्त केलो ना जाल्यार तालुक्यांतल्या कृशी उत्पादनाचेर ताचो विपरीत परिणाम जावपाची भिरांत उप्रासल्या. माकडां कडल्यान नाल्लांची व्हडा प्रमाणात नासाडी जाता. ते माडाच्या कवळांत वचून नाल्ला बोणां खाऊन वडयतात. माकडांचो उच्छाद थांबयलो ना जाल्यार सत्तरी तालुक्यांतलें नाल्लांचें उत्पादन कमी जावपाची शक्यना न्हयकारपाक जायना.
रानवटी जनावरांक मारपाक रानां जीव कायद्यान बंदी आसा. मात कृशी उत्पादनाचें लुकसाण करपी जनावरांक उपद्रवी घोशित केल्यार शेतकार संबंदीत सरकारी अधिकाऱ्यां कडल्यान परवानगी घेवंन शेतकार तांका मारपाक शकतात. रानदुकर भाजीपाल्याची आनी केळ्या झाडांची नासाडी करतात. तांकां सरकारान उपद्रवी घोशीत जरी केलां तरी तांकां मारपा संबंदांत अजून कसलेंच स्पश्टिकरण दिल्लें ना. रानदुकरांचो बंदोबस्त करपा खातीर सुस्पश्ट धोरण जाहीर करचें अशी कृशी उत्पादकांची मागणी आसा.
रानवटी जनावरांक लागून सत्तरी तालुक्यांतले शेतकार अडचणींत आयल्यात. तातूंतल्यान तांकां भायर काडपाची जापसालदारी सरकाराची आसा. ना जाल्यार कृशी उत्पादक ना जावपाची भिरांत आसा अशें नगरगांव हांगच्या गोपाळ गांवकारान सांगलें. कृशी खातें आनी राना खात्यान रानवटी जनावरांच्या उपद्रवाचेर उपाय येवजण करपाची गरज आसा, अशें केरी हांगच्या लक्ष्मण गांवकारान सांगलें. तरणाट्यांनी कृशी वेवसाया सुरू करचो अशें आवाहन सरकार करता मात उपद्रवी जनावरांचो बंदोबस्त करपा खातीर कांयच करना असो आरोप गुळेली हांगच्या योगेश देसायान केलां. वाळपयचो आमदार आनी मंत्री विश्वजीत राणे आनी पर्येची आमदार दिव्या राणे हांणी रानवटी जनावरांच्या प्रश्नांत लक्ष घालून कृशी उत्पादकांक थाकाय दिवची अशी मागणी सध्या जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
