भांगरभूंय | प्रतिनिधी
भांगरभूंय । प्रतिनिधी
म्हापशेंः शिवोली मतदारसंघातल्या दर्या देग वाठारांत रातयां व्हडा आवाजन संगीत वाजोवपी आस्थापनांचेर कारवाय करात आनी तांची संगीत उपकरणा जप्त करपाची सूचोवणी शिवोलेची आमदार डिलायला लोबो हिणे पुलिसांक केल्या.
हालींच वझरात वागातोर हांगच्या कांय ज्येश्ठ नागरिकांनी लोबो हांची भेट घेवन आवजाचें प्रदूशण करतात तांचे आड कारवाय करपाची मागणी केल्ली. लोबो हिणे हणजूण पुलील स्टेशनांत बसका घेवन तांका कारवाय करपाची सूचोवणी केली. ह्या वेळार पुलीस निरीक्षक प्रशांत नायक देसाय, पंच वांगडी दिनेश पाटी, अॅग्नेस कार्व्हालो, रेस्टारनंट आनी क्लब धनी आनी थळावे लोक हाजीर आशिल्ले. आपल्याक काळजाचे दुयेंस आसा. रातीं उसरां मेरेन संगीत वाजयतात ताचो आपल्याक त्रास जाता अशें एका जाण्टेल्यान सांगलें.
वागातोर ह्या रहिवासी वाठारांत जायती रेस्टॉरन्टा आसात. थंय रातया व्हडा आवाजान संगीत वाजयतात. थळाव्या लोकांक ताचो सामको त्रास जाता. मार्च म्हयन्यांत विद्यार्थ्यांच्यो परिक्षा आसतल्यो. ताकां सुशेगादपणान अभ्यास करपाक मेळपाक जाय. ताका लागून व्हडा आवाजन संगीत वाजयतात ताचेर कारवाय करून उपकरणा जप्त करपाक आपणे सांगलां अशे डिलायला लोबोन सांगलें.
रेस्टॉरन्टांनी येवपी गिराकांक हेडफोन वापरपाचो पर्याय उपलब्द करून दिवपाची सूचोवणी रेस्टॉरन्ट धनयांक केल्या. हेडफोन लावंन तें संगीताचेर नाचपाक शकले. ना जाल्यार इंडोर सावंडप्रफ वेवस्था करपाक जाता. जाका लागून थळाव्या लोकांक त्रास जावचो ना. रेस्टॉरन्टवाल्यांनी काना मनार घेतलें ना जाल्यार पंचायतीक तांचो परवाने रद्द करपाक मेकळीकदितले अशें लोबोन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
