रातीची शाळा

भांगरभूंय | प्रतिनिधी

बरेच खेपो कांय कारणांन लागून मनांत इत्सा आसुनूय शिकप जायना. नोकरी धरची पडटा. मागीर शिकपाचें सपनुच उरता. आदल्या तेंपार म्हापश्यां सारक्या शारांत रातीची शाळा आसताली. जायते जाण तिचो लाव घेतलो. पूण तो उपक्रम बंद जालो. मागीर शिकपाची इत्सा आशिल्ल्यांक पत्रां वरवीं शिकप होच उपाय आसलो. पूण, कांय जणांक शाळेन वाचून सगळ्या वांगडा शिकचें तशेंच कितें प्रस्न आसात तर शिक्षकांक विचारप अशें मनान आसा, तांचे खातीर पणजे डॉन बॉस्को संस्थेन बरो पर्याय सामकार हाडला, तो म्हळ्यार बारावी मेरेन तुमकां शिकपाची संद त्यांच्या रातच्या शाळेंन मेळूं शकता. सदचे शाळे सारकें वातावरण तुमकां मेळटलें. खेरीज ही शाळा गोंय शालांत मंडळा कडेन नोंद जाल्ली आसा. हाका लागून जे दिसाची नोकरी ना जाल्यार हेर व्यवसाय करतात, त्यांचे खातीर ही एक बरी संद आसा अशें म्हणू येता.
अशें म्हणटात, की शिकपाची सुविधा नासत तर मनीस वायट मार्गाक लागूं शकता वा ताची प्रगती जावप कठीण जाता. हें मतींत दवरून डॉन बॉस्को संस्था शिकपाच्यो सुविधा, त्योय परवडपा सारके फियेंत दिवपाचो यत्न करता. गोंयांत पणजे भितर तांणी बीपीएड शिक्षण दिवपी संस्था सुरु केली. जायचो लाव तिचो लाव घेतात. हें शिक्षण घेवपाक विद्यार्थ्यांक गोंयां भायर तरी वच्चे पडटाले नाजाल्यार दुसऱ्या खंयच्या फाट्यान प्रवेश घेवचो पडटालो. शिकपी विद्यार्थ्यांक इत्सा आसुनूय शिकपाक मेळनासले. ती सुविधा डाॅन बॉस्को संस्थेन पणजे सुरु केल्या. गेलीं 25 वर्सां तांची सांज वेळार शाळा भरपाचो प्रयोग सुरु आसा आनी तातूंतल्यान जे विद्यार्थी पास जावन भायर सरल्यात ते बरे तरेन नोकरी करतात. देखीक संजय कुंडयकार हो हांगा शिकला. तो आतां एके खाजगी पतसंस्थेंत काम करता. तो सांगता डॉन बॉस्को संस्थेन अशी सुविधा सुरू केली तिचो म्हज्या सारख्याक खूब लाव जालो. म्हूण तर बारावी जावन फुडें इग्नो वतीन फुडलें शिक्षण घेवंक शकलों. आतां तो कुंडय वसाहतीन कामाक आसता.
महाराष्ट्रांत रातींच्यो शाळा म्युनिसिपालिटी चलयतात आनी तांची वेळ आसता 6 ते 9. हातूंत ल्यान एखादो कामाक वचपा कामगार आपले शिकप चालू दवरुं शकतात. आयज शिकप नासत तर कठीण जीण जगची पडटा. बरेच वेळा एकदा नोकरी लागली कि फुडें शिकपाक चडशे जाण तयार नासतात, पूण रातशाळा बरेच सुवातीचेर सुरु जातकच हातून फरक पडूं शकता. महाराष्ट्र सरकार रातशाळा जीवित रावच्यो हाचे खातीर यत्न करता. एक म्हळ्यार रोजगार दिवपाक एक संद मेळटा, खेरीज दिसाच्यो शाळा जें सामान वापरतात ताचो उपेग रातच्या शाळांनी बऱ्या तरेन जाता.
हो प्रयोग सगळ्या सुवातींनी जावं येता. विद्यार्थी मेळप हि समस्या जशी दिसाच्या शाळांक आसा, तीच समस्या रातच्या शाळां खातीर नक्कीच आसतली. फुडें फाटीं सरकारान हाचेर विचार करचो आनी जमता त्यो सुविधा आंखपाचो विचार जरूर करचो. बालरथाचो विद्यार्थी हाडपाक उपेग लेगीत करपाक जाता. हें धोरण ते – ते शाळेन थारावं येता. तुमी जर इत्सू आसात तर डाॅन बाॅस्को संस्थेक जरूर भेट दिवची. त्या आदीं तुमी तांचें संकेतस्थळ पळोवं शकतात. (dbnhspanjim.edu.in वा https://www.dbhspanjim.edu.in/nightschool-hsc.php) विद्यार्थी संख्या उणी जाता म्हूण दोन शाळा एकठांय हाडपाचो विचार सरकार करता त्या वेळार अशा इमारतींन फक्त जे नोकरेक आसात, तांचे खातीर रातची शाळा भरपाचो प्रयोग कित्याक करचो न्हय? नोकरेक आसल्या कारणान ते जबाबदारीन वागतले अशें दिसता. दिसाचे शाळेन हुशार भुरगेच न्हय तर काय वेळा काठार पास जाल्ले विद्यार्थी लेगीत प्रवेश घेतात. नोकरेक आसता तांचे भितर शिकपाची उमेद आसता. फक्त तांकां सुविधा ना म्हूण ते शिकूंक शकनात. डॉन बॉस्को संस्थेन तांकां संद दिल्या. इत्सुकांनी ताचो लाव जरूर घेवचो. तांणी ब्रुनो फेर्रांव (98231 85805) हांचे कडेन संपर्क करून मेळपाचो वेळ थारावचो.

प्रा रामदास केळकार
9822583275