भांगरभूंय | प्रतिनिधी
पणजी : सरकारान दुकानां आनी आस्थापनांनी बायलांक सांजेचीं ७ ते सकाळीं ६ वरां मेरेन काम करपाची परवानगी दिल्या. ह्या निर्णयाक येवकार. मात हे विशीं तयार केल्ल्या नेमांची योग्य अंमबजावणी जाता काय? हें पळोवपा खातीर विशेश समितीची स्थापना करची अशी मागणी गोंय प्रदेश महिला कॉंग्रेसीची अध्यक्ष प्रतीक्षा खलप हांणी केली.
सोमारा पणजे जाल्ले पत्रकार परिशदेंत पतिक्षा खलप उलयताली. ह्या वेळार एल्सिंडा गोन्सालविस, ऍड. लविनिया डिकोस्टा हजर आशिल्लीं.
सरकारान हे विशीं कांय दिसां आदीं अधिसुचवणी जारी केल्या. बायलांक रातच्या वेळार काम करपाचो निर्णय बरो आसा. मात आस्थापनां कडल्यान असल्या बायलांचे सुरक्षिततेचे नेम पाळप तितलेंच गरजेचें. हाका लागूनच सरकारान अनुपलान समितीची स्थापना करपाक जाय. समितीन दुकानां, आस्थापनांनी बायलो सुरक्षित आसात काय हाचें ऑडीट करपाक जाय. तशेंच आस्थापनांच्या अचकीत तपासणेचे अधिकारूय समितीक आसपाक जाय, अशें तिणें मुखार म्हणलें.
रात्रपाळयेर काम करप्यां खातीर बायलां कामगारांची लिखीत परवानगी घेवप गरजेचें. मात बायलां कडल्यान बळयां अशी परवानगी बरोवन घेवची न्हय. हे खातीर यंत्रणां आसप गरजेचें. अशा बायलांक तांच्या घरांतल्यान हाड-व्हर करपाक येरादारी वेवस्था गरजेची केल्या. हाका लागून येरादारी खर्च बायलांच्या पगारांतल्यानूच कापिनासतना हाचे खातीर सरकार कांय अनुदान दितलें काय? हें स्पश्टकरचें. असल्या वाहनांनी बायलां सुरक्षा रक्षक आसप गरजेचें, अशें तिणें म्हणलें.
मुखार खलप हांणी म्हणलें, कॉंग्रेस पक्ष बायालं सबलीकरणाक सदांच फाटबळ दितलो. मात सुरक्षीत वातावरण आसले बगर बायलां सबलीकरण हें बायलांचें शोशण थारतलें. सरकारान पयलीं रातच्या वेळार पुलिसांची गस्त वाडोवची. सगल्या सुवातांचेर रस्त्यावेल्यो लायटी आनी सीसीटीव्ही कॅमेरे लावप अश्यो गरजो पुराय करच्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
