भांगरभूंय | प्रतिनिधी
कळंगूटे, कांदोळी आनी मांद्रें दर्यादेगे वयल्या शॅक धनयांक पुलिसांचे आदेश
भांगरभूंय । प्रतिनिधी
म्हापशें: कळंगूटे, कांदोळी आनी मांद्रें दर्यादेगांचेर शॅक कर्मचाऱ्यां कडल्यान पर्यटकांक मारपेट जावपाच्या घडणुकांचे फाटभुंयेर रातच्या 12 वरां मेरेन ह्या पट्ट्यांतले सगळे शॅक बंद करपाचे आदेश पुलीस अधिकाऱ्यांनी दिल्यात. ह्या आदेशाची अंमलबजावणी पर्यटक पुलीस करतात. ह्या आदेशाचो वयल्या तिनूय दर्यादेगां वयल्या वट्ट 236 शॅकांक हाचो मार बसला.
रातच्या 1 वरा मेरेन शॅक चालू दवरपाची परवानगी आमचे कडेन आसतनाय पुलिशे कडल्यान ही जबरदस्ती कित्याक, असो प्रस्न शॅक धनी संघटणेन उपस्थीत केला.
शॅक धोरणा वरीच आमी कारवाय करतात. हे आदीं पुलिसां कडल्यान ह्या नेमांक पाळो दिताले. आतां ही कारवाय नदरेक पडटा, अशी म्हायती पुलीस अधिकाऱ्यांनी दिली.
हालींच कळंगूटे दर्यादेगेर शॅक कर्मचाऱ्यां कडल्यान पर्यटकांचेर जिवघेणो हल्लो जाल्लो. ह्या हल्ल्यांत एका पर्यटकाक जीव वगडावचो पडलो, जाल्यार एकलो गंभीर जखमी जाल्लो. तशेंच मांद्रें आनी कांदोली दर्यादेगेर लेगीत शॅक कर्मचाऱ्यांनी असोच पर्यटकांक मारपेट करपाचे प्रकार घडिल्ले.
ह्या प्रकरणा उपरांत पुलीस अधिक्षक अक्षत कौशल हांणी वयल्या दर्यादेगे वयले शॅक रातच्या 11 वरां मेरेन बंद करपाचे निर्देश दिल्ले. मात थळाव्या आमदाराचे विनवणे वयल्यान शॅक बंद करपाची मुजत रातच्या 12 वरां मेरेन वाडयल्या. हो नेम गोंयांतल्या सगळ्याच दर्यादेगांचेर आशिल्ल्या सॅकांक लागू आसा. मात वयल्या तिनूय दर्यादेगे वयले शॅक बंद करपाची सक्तीची कारवाय पर्यटक पुलिसांचेर दिल्या.
मजगतीं, शॅकां वयलें संगीत रातच्या 10 वरां मेरेन बंद जाता. ते उपरांत शॅक रातच्या 11 वरां मेरेन उक्ते आसतात. हे खातीर पर्यटन खात्यान परवानगी दिल्या. जाल्यार मध्यानरातीर 1 वरा मेरेन सोरो विकपा संबंदांतलो परवानो अबकारी खात्यान दिला. शॅक धोरणा प्रमाण संबंदीत खात्या कडल्यान हे परवाने दितात. तरी लेगीत मध्यानरातीर 12 वरां मेरेन शॅक बंद करपाची सक्ती अन्यायकारक आसा, अशें शॅक धनयांचें म्हणणें आसा.
सरकारान ताकतिकेन उपाय काडचोः जॉन लोबो
पर्यटन आनी अबकारी खात्याच्या परवान्या प्रमाण आमी रातच्या 1 वरा मेरेन शॅकाचो वेवसाय करतात. मात आतां अचकीत रातच्या 11 वरां मेरेन शॅक बंद करपाची सक्ती पुलिसां कडल्यान जाता. एक- दोन घडणुकांक लागून सरसकट सगळ्याच शॅक वेवसायिकांक लक्ष्य करप चुकीचें आसा. गोंय सरकारान तत्काळ हातूंत लक्ष घालून उपाय काडचो, अशी माहणी गोंय शॅक धनी कल्याण सोसायटीचे सरचिटणीस जॉन लोबो हांणी केल्या.
पुलिसांची दर्यादेगांचेर बारीक नदर
दर्यादेगांचेर हालीसराक पर्यटकाक मारबडय करपाच्यो घडणुको वाडल्यात. हे फाटभुंयेर शॅक मध्यानरातीर बंद जाले परांत दर्यादेगेर कोणूच पासय मारचो ना वा सोरो पियेवचो ना, हाची खात्री पर्यटक पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
