भांगरभूंय | प्रतिनिधी
-पुलिसांच्या निर्णयांचेर शॅक धनयांची प्रतिक्रियापणजीः रातच्या 12 वरां मेरेन शॅकां बंद करप हो निर्णय कोफुसावांचो आसा. आमकां कायद्या प्रमाण रातच्या 1 मेरेन शॅक बंद करपाचो आदेश आसा. पूण अचकीत ही अट घालून सरकार आमच्या वेवसायाचेर हावळ हाडपाक सोदता. कोणाक रातच्या 1 वरां मेरेन शॅक चालू करपाक परवानगी आसा ते चालू दवरतले. हेर रातच्या 12 वरां मेरेन बंद करतले, अशें शॅक वेवसायिकांनी सांगलें.
कळंगूट दर्यादेगेर फाटोफाट पर्यटकांक मारबडय करपाच्यो घडणुको घडले उपरांत सरकारान खर पावलां उखल्ल्यांत आनी शॅका आड निर्बंध आनीक खर केल्यात. हाचोच एक भाग म्हण गोंयच्या सगल्या शॅकांक रातच्या 12 वरां मेरेन सगलीं शॅकां बंद दवरपाचो आदेश पुलिसांनी दिला.
हे विशीं उलयतना परंपरीक शॅक संघटणेचे अध्यक्ष मॅन्युएल कार्दोज हांणी सांगलें, जो आदेश काडला ते कोफुसांवाचो आसा. कांय शॅक बेगीन म्हणल्यार रातच्या 11 जाल्यार कांय शॅक उसरां रातच्या 3 ते 4 वरां मेरेन बंद करतात.
पर्यटन खातें रातच्या 11 वरां मेरेन शॅक बंद कर म्हण सांगता जाल्यार अबकारी लिसेन्साचेर आमकां रातच्या 1 वरां मेरेन शॅक उक्तें दवरपाची सवलत आसा. रातच्या 1 वरां मेरेन शॅकां उक्तीं दवरपा खातीर अबकारी खात्याक आमी लिसेन्साचेर अतिरीक्त शुल्क दितात आनी सरकार खंयच्या तोंडान आमकां रातच्या 12 वराक शॅकां बंद कर म्हण सांगता. जर बारांक शॅकां बंद कर सांगता जाल्यार सरकारान अबकारी खात्याक भरिल्लो शुल्क परत दिवचो, असो युक्तीवाद कार्दोज हांणी केला.
पर्यटकांक मारबडयचे घडणुकेक लागून हो निर्णय घेतला. पूण हांव सरकाराक सांगपाक सोदता सकाळीं घडणुको जावपाक शकनात, सांज वेळार घडणुको जावच्यो नात व्हय, हो निर्णय घेवचे पयलीं शॅक वेवसायियांक विस्वासांत घेवपाक जाय आसले. हो निर्णय वेवसायाचेर हावळ हाडटलो. सनबर्न महात्सवांत एकल्याक मरण आयलें तेन्ना सनबर्न बंद कित्याक बंद उडोवंक ना. फकत शॅककारांच्या जीवार कित्याक उठल्यात, अशे कार्दोज हांणी सांगलें.
जाल्यार अखील गोंय शॅक धनी संघटणेचे सरचिटणीस जॉन लोबो हांणी सांगलें, जो वेळ आमकां पर्यटन खात्यान घालून दिला तोच वेळ आमी पाळटले.
पर्यटन खात्यान कांय शॅकांक 11 मेरेनचो वेळ दिला आनी कांय शॅकांक अबकारी खात्यान रातचे 1 वरां मेरेनचो वेळ दिला. देखून कांय शॅका 11 वरां मेरेन बंद जातात आनी कांय 1 वरां मेरेन चालू दवरतात. आतां कायदो म्हणटात तो आमकां पाळचोच पडटलो. जांकां रातच्या 11 वरां मेरेन बंद करपाक सांगल्यात ते करतलेच, पूण जांचे कडेन अबकारी परवाने आसात ते 1 वरां मेरेन शॅकां चालू दवरतलें, अशें जॉन हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
