भांगरभूंय | प्रतिनिधी
पणजीः गोंयांत पर्यटन हंगाम, धर्मीक उत्सव, लग्नां लागीं पाविल्ल्यान रातच्या उसरां मेरेन संगीत वाजोवपाचेर निर्बंध घाल्यात. रातच्या 10 वरां उपरांत परवानो नासतना संगीत वाजयल्यार, नेमांचें उल्लंघन केल्यार एक लाख रुपया मेरेन दंड भरचो पडटलो. वेवसायिक आस्थापन वा हेर आस्थापनांनी आवाजाच्या नेमाचें दोन फावटीं उल्लंघन केल्यार आस्थापन सील करतले. तशेंच तीन म्हयन्यां खातीर परवाने रद्द करतले.
गोंय राज्य प्रदुशण नियंत्रण मंडळाचे बोर्ड (Goa State Pollution Controll Board) बसकेंत हाचेर सविस्तर चर्चा करून वयलो निर्णय घेतला. एसओपीय थारायल्या.
बोर्डान घेतिल्ल्या निर्णया प्रमाण, पयले फावट नेम मोडल्यार आस्थापनाचेर वा धनयाक 20 हजार रुपया दंड भरचो पडटलो. दुसरे फावट 40 हजार रुपया दंड घालतले. दंड भरीमेरेन परवानोय रद्द करतले. नेम मोडप चालूच उरल्यार व्हड दंड घालतले. नेम मोडल्यार नेमिल्लो अधिकारी कारवाय करतलो. लाऊडस्पीकर लावपाक लेखी परवानगी घेवची पडटली.
आवाजाची मर्यादा
वेवसायीक: 66 डीबी (दिसाची), 55 डीबी (रातीं), निवासी वाठार 55 डीबी (दिसाची), 45 डीबी (रातीं), सायलेंट वाठार 50 डीबी (दिसाची), 40 डीबी (रातीं).
पुलिसां कडल्यान अतिरिक्त परवानगी घेवची
ट्रान्समीटर, हेडफोन वा हेर तंत्रज्ञान वापरून संगीत वाजोवपा खातीर पुलिसां कडल्यान अतिरिक्त परवानगी घेवची पडटली.
आवाजाच्या नेमांचें उल्लंघन जावचें न्हय हे खातीर गोंय राज्य प्रदुशण नियंत्रण मंडळाचे अधिकारी नदर दवरतले. परवानगे बगर लाऊडस्पीकर वाजोवपाक वा भौशीक सुवातेर बसका घेवंक मेळची ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
