भांगरभूंय | प्रतिनिधी
जर्मनीच्या हेल्महोल्ट्ज म्युनिच संशोधन केंद्राचो दावो
बर्लिन, खबरां संस्था ः जशी उश्णताय वाडटा तशें रातच्या वेळारच्या तापमानातय वाड जाता आनी हाका लागून भलायकेच्या समस्यांचो धोको वाडटा. जर्मनीच्या हेल्महोल्ट्ज म्युनिच संशोधन केंद्र आनी ऑग्जबर्ग युनिव्हर्सिटीन केल्ल्या संशोधनांतल्यान रातच्या वेळार तापमान वाडल्यार ‘स्ट्रोक’ येवपाचो धोको 7% मेरेन वाडूंक शकता अशें दिसून आयलां. तशेंच ताण, हुस्को आनी न्हिदे संबंदीत समस्याय सुरू जातात. उश्ण रात, न्हीद उणी जावप हाका लागून कुडींतल्या ताण हार्मोनांची पातळी वाडटा आनी तांचें स्ट्रोकाचो धोको वाडोवपाक म्हत्वाचो वांटो आसता.
ह्या अभ्यासांत 2006 ते 2020 मेरेनच्या 11,037 स्ट्रोक प्रकरणांचे विश्लेशण केलां. ह्या काळांत उश्ण रातींचो आंकडो 79 वयल्यान 82 मेरेन वाडला. रातच्या वेळार वाडिल्ल्या तापमानाचो मुखेलपणान जाण्टे आनी बायलांचेर परिणाम जाल्ल्याचेंय ह्या अभ्यासांतल्यान स्पश्ट जालां.
शारांनी रावपी लोकांक चड धोको
शारांतल्या वाठारांनी घरां, रस्ते आनी हेर सगळ्यो मुळाव्यो बांदावळी दिसांच्यो खूब गरम जातात आनी रातच्या वेळार ल्हवू ल्हवू थंड जातात. ते भायर शारांतल्या चडशा घरांनी हवामानाची बरी वेवस्था ना. हाका लागून रातच्या वेळार घरांतली उश्णताय बेगीन उणी जायना. देखून गांवां परस शारांतल्या लोकांक चड धोको निर्माण जाता. संशोधक चेंग हांच्या मतान हो धोको उणो करपा खातीर हाचेर लक्ष दिवप गरजेचें आसा. तांच्या मतान एअर कंडिशनिंगच्या उणावाक लागूनूय स्ट्रोक येवपाचो धोको वाडूंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
