रातची रान भोंवडी करपाची आसा?

भांगरभूंय | प्रतिनिधी

जीटीडीसी आनी गोंय रानां खात्यान रानां जीव आनी सैम मोगीं खातीर २९ आनी ३० जुलयाक भोंवडेची कार्यावळ दवरल्या. फक्त सैमाची खूब आवड आशिल्ल्या लोकांनीच हे १ दीस आनी १ रातीचे कार्यावळीक येवचें. 

बोंडला आनी ताचे भोंवतणचो इतिहास सव्या शेंकड्या सावन मेळटा. ह्या वाठारांतल्यान पुरातत्वीय म्हत्वाच्यो मूर्ती मेळ्ळ्यात. धारबांदोडें- सत्तरी- फोंडें तालुक्याच्या तिस्कार बोंडला प्राणीसंग्रहालय आसून ताचे भोंवतणी स गांव आसात. हांगां रगाडा न्हंय आनी बोंडला रान आनी प्राणी संग्रहालय वाठारांत जायते हंगामी व्हाळ, उत्तरेक म्हादय न्हंय आसा. 

भोंवडेचें मुखेल लक्ष्य रानफुलां आनी सुकणीं पळोवपाचें आसा. रानांत चलत फिरपाक मेळटलें. सोरोप, बेबे आनी शेड्डे पळोवपाक मेळटले.

शेनवार, सांजवेळा 5 वरां मेरेन बोंडला पावप, वसतीघरांनी चेक इन करप (शेअरिंग तत्वाचेर), सांजवेळा 6.30 ते 7.30 मेरेन बोंडला रानांजीव अभयारण्याची आनी रानवटी जनावरांची वळख, सांजवेळा 7.30 वरांचेर बोंडला रानां अधिकाऱ्यां वांगडा रानाची भोंवडी. ८.३० वरांचेर जेवण (शिवराक आनी नुस्त्याचें), वांगडा सैम आनी संवर्धना विशीं सोरोप, बेबे तज्ञां कडेन भासाभास. 

आयतार, ३० जुलयाक सकाळीं 6 वरांचेर नाश्तो, 7 वरांचेर सकाळीं रानां भोंवडी, ९.३० क डेन रेस्टाॅरंटांत नाश्तो, सकाळीं 10.30 वरांचेर दायज स्थळ आनी बोंडला प्राणीसंग्रहालयाची भोंवडी, 12 वांटेकार सैममोगीं कडल्यान सुचोवण्यो आनी मुल्यमापन, 12.30 जेवण जावन ही कार्यावळ सोंपतली. 

भोंवडेचो खर्च 2200 रुपया (च्या, नाश्त्या सयत, रातचें जेवण, सकाळीं च्या, नाश्तो, जेवपाची, रावपाची सुवात डाॅर्मेटरी. दोग जाणांक रावपाक जाय जाल्यार दर मनशाक 2700 रुपया शुल्क आनी वयर सांगिल्ल्या गजालींचो आसपाव)

गाडी दनपरां अडेच म्हापश्यां, तिनांक पर्यटन भवन पणजे आनी ३.१५ क मडगांव रेसिडन्सी (वाटेर रावूं येता.) वांटेकार जावपी सैममोगींनी मातयेच्या वा रानांक योग्य अश्या रंगाचे कपडे, रेनकोट, बॅटरी, उदकाची बाटली, ट्रेकिंग करपाक जोतीं हाडचीं. नांवनोंदणी करपाक अनिल दलाल, जीटीडीसी – 9422057704, 8379022215 हांचे कडेन संपर्क करचो. ऑनलायन बुकिंगे खातीर – goa-tourism.com