भांगरभूंय | प्रतिनिधी
भावंडांनो,
स्वताचे जिणेंत दुख्खाचें पांय सोंशीत आसतना लेगीत सदांच आपलें आयुश्य दुसऱ्यांच्या हिता खातीर ओंपपी आनी आयुश्याच्या निमाण्या उस्वासाच्या खिणा मेरेन आपले प्रजेक आपल्या भुरग्यां वरी मानून तांचेर उपाट मोग करपी महाराणी म्हळ्यार मध्य प्रदेशांतल्या इंदौरच्या होळकर घराण्याची महाराणी. हय भावंडांनो… देशभर धर्मप्रेमी, न्यायप्रीय, जनकल्याणकारी, तशीच म्हान प्रशासक, राज्यकर्ती म्हूण जांची इतिहासांत नामना आनी वळख आसा तीच महाराणी दीपस्तंभा वरी अचल उरिल्ली धर्मशील राणी अहिल्याबाई होळकर. 13 ऑगस्टाक तिची पुण्यतीथ पुराय देशभर मनयतात. ते निमतान तिच्या म्हान कार्या विशीं तुमकां थोडीशी म्हायती मेळची म्हूण सांगतां. आयकात…
अहिल्याबाईचो जल्म औरंगाबादेंतल्या चोंढे गांवांत जालो. बापूय माणकोजी शिंदे हे त्या गांवचे पाटील आशिल्ले. बापायन अहिल्याबाईक पिरायेच्या आठव्या वर्सा इंदौरच्या पराक्रमी मल्हारराव होळकर हांचो पूत खंडेराव हांचे वांगडा तिचें लग्न लावन होळकर घराण्याची सून केली. पूण अहिल्याबाईचें नशिबूच वेगळें आशिल्लें.
पराक्रमी मल्हाररावाचें शौर्य, कर्तृत्व पूत खंडेराया कडेन नाशिल्लें. उरफाटें, खंडेराय वेसनी आनी वायट वागणुकेचो आशिल्लो. ताका लागून तरणाटेपणांत देवधर्म करून कुटुंबाची अर्थीक वेवस्था बरी दवरपा खातीर अहिल्याबाईची जापसालदारकी वाडली. तिची हुशारकी, चालाकी, बुंदवंतपणा पळोवन मल्हाररायांनी चडश्यो जापसालक्यो तिचेर सोंपोवन तिका राज्यकारभाराची शिकवण दिली. अहिल्याबाईक दोन भुरगीं जालीं. पूत मालेराय आनी धूव मुक्ताबाय. त्याच वेळार कुंभेरीच्या झुजांत अहिल्याबाईचो घरकार खंडेरायाक मरण आयलें. समाजाचे चालीरिती प्रमाण ‘सती’ वचपाची वेळ तिचेर आयली. पूण मल्हाररायाचेर आयिल्ल्या दुख्खान आनी कुटुंबाचे जापसालदारके कडेन लोकांच्या रितीची पर्वा करिनासतना तिणें ‘सती’ वचपाचें न्हयकारलें. कुटुंबाची आनी राज्याची जापसालकी तिणें आपल्या भुजार घेतली. पूण संकश्टां आनी दुख्खां तिचे फाटीकच लागिल्लीं. तिचो पूत बापाय भशेन वायट वागणुकेचो थारलो. मालेराव दौलतीचो वारसदार कर्तृत्वान जावचे बदला दुश्ट सभावाचो जालो. लोकांक खूब सतावंक लागलो, आनी फुडारांत पिशेपणांतूच एका दिसा सोंपलो. मुखार तिच्या जिवितांत एका फाटोफाट एक अशीं संकश्टां आयलीं. नातू आनी जांवय हांकां अल्पकाळांत मरण आयलें. दुख्खाच्या संकश्टांत धूव मुक्ताबाय ‘सती’ गेली. पूण अहिल्याबाईन धीर सोडलो ना.
तिच्या धनदौलतीचेर दोळो आशिल्ल्या दुस्मानाक लेगीत तिणें आपले हुशारकायेन राज्यांत बायलांचें सैन्य तयार करून फुडो केलो. राज्यांतल्या भिल्ल, गोंड, रामोशी आदीं लुटमार्यांचो तिणें बंदोबस्त केलो.
अहिल्याबाई एक राणीच न्हय तर ती धर्माची राखण आनी जतनाय घेवपी एक आदर्श शासिका आशिल्ली. देशांतल्या बारा ज्योतिर्लिंगा मदल्या कांय जाणांचें परतून बांदकाम करून हिंदू धर्माचे संस्कृतायेचो सांबाळ केलो.
भावंडांनो, जिर्णोद्धार केल्ल्या ज्योतिर्लिंगां मदीं काशी विश्वनाथ, सोमनाथ, महाकालेश्वर, ओंकारेश्वर आनी त्र्यंबकेश्वर हीं मुखेल देवळां आसात.
भावंडांनो, फक्त ज्योतिर्लिंगाच न्हय तर पुराय देशांत तांणी समाजीक, भौशीक बांदकामां सयत तिर्थक्षेत्रां, देवळां घांट, बांयो, तळयो तशेंच धर्मशाळा बांदल्यो. देखूनच ती आपल्या प्रशासनान आनी समाजसेवेन आयजवेर भारतीयांच्या मनांत जिवी उरल्या. 13 ऑगस्टाक आमी नमळायेन तिच्या चरणा कडेन नतमस्तक जावया आं…
उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
