राज ठाकरे हांच्या भाशणांतलेच कांय अंश

भांगरभूंय | प्रतिनिधी

मुंबय : मुंबय शिवतिर्थाचेर संवसार पाडव्या निमतान मनसे फुडारी राज ठाकरे हांची सभा जाली. तातुंतल्या भाशणांतले कांय अंश.

० मुंबय शारांत आमकां सांगतात, मराठी उलोवचे नात. मराठी उलोवंक नात, जाल्यार कानसुलाचेर पडटलें. महाराष्ट्रांत, मुंबयंत मराठीचो मान राखपाकूच जाय. हांगाचे प्रत्येक बँकेंत मराठी वापरतात काय नात, तें पळयात.

० देशांत मुस्लिम रस्त्याचेर येतात, तेन्नाच हिंदू रस्त्याचेर येतात. दंगल सोंपली काय ते मराठी, गुजराती, पंजाबी जातात. मागीर मराठी जाले म्हणटकच साळी, माळी, कुणबी, ब्राह्मण जातात. आपले जाती विशीं मोग आसप बरें, पूण दुसरे जातीं आनी धर्मां विशी दुस्वास आसप, ही विकृती.

० ‘लाडकी बहीण’ येवजणे खाला 2100 रुपया दितले खंय. तशें केल्यार महाराष्ट्र सरकाराचेर वर्साक 63 कोटी रुपया रीण जातलें. पांच वर्सांनी साडेतीन लाख कोटींचें रीण जातलें. ताका लागून ही येवजण बंद जातली. ती फक्त वेंचणुके पुरती आशिल्ली.

० रोजगाराचे प्रस्न आसात. आस्थापनांनी भायल्या लोकांक भरप चालू आसा. कारण आमी आमच्या भुरग्यांक जाती, धर्मा मदीं घुस्पावन दवरल्यात. व्हाॅट्सअॅपांत गुंतोवन दवरल्यात. मूळ प्रस्नां कडेन कोणाचेंच लक्ष ना.

० औरंगजेबाक ‘शिवाजी’ हो विचार मारपाचो आशिल्लो. तो ताका जमलो ना. संवसाराच्या इतिहासांत औरंगजेब वाचतात, अभ्यास करतात. तेन्ना लोकांक शिवाजी महाराजाचें शौर्य कळटा. औरंगजेबाचे कबरीची सजावट काडून उडयात. थंय तक्टो लायात, ‘मराठ्यांक हारोवपाक आयिल्ल्या औरंगजेबाक हांगा पुरला. अफझलखानाची कबर प्रतापगडाच्या सकयल आसा. महाराजांक विचारले बगर ती बांदल्या? शक्यूच ना. जांकां पुरल्यात, तांचीं प्रतीकां नश्ट करून चलचें ना. संवसाराक दाखोवपाक जाय, तांकां आमी मराठ्यांनी हांगां पुरल्यात.

० आमकां रानां, उदक वा हेर विशयां परस कितें म्हत्वाचें? तर औरंगजेबाची कबर. ती काडपाचो विशय आतां खंयच्यान आयलो? सिनेमा पळोवन जागे जावपी हिंदू कांय कामाचे नात. सिनेमा देंवलो काय सगले देंवले. विकी कौशल मरतकच आनी अक्षय खन्ना औरंगजेब जावन येतकच आमकां औरंगजेब कळ्ळो? व्हाॅट्सअॅपाचो इतिहास वाचून उपकारना. ते खातीर पुस्तकां वाच्चीं पडटलीं. औरंगजेबाचेर कोणूय उठ्ठा उलयता. विधानसभेंतूय उलयतात.

० कुंभमेळ्याक गेल्ले बाळा नांदगावकर हांणी उदक हाडलें. हांवें सांगलें, पिवचो ना. तें आयकून नव्यान वारें कानांत भरिल्ल्या हिंदुत्ववाद्यांक दिसलें, हांवें कुंभमेळ्याचो अपमान केलो. मूर्ख रे तुमी? देशांतल्या न्हंयांची आयज भिरांकूळ अवस्था जाल्या. न्हंयांक आमी माता, देवी म्हणटात, पूण तांचे कडेन सरकार आडनदर करीत आसा.