राज्य सांस्कृतीक पुरस्कार जाहीर

भांगरभूंय | प्रतिनिधी

सांखळेचें पांडुरंग प्रासादीक नाट्य मंडळ थारलें ‘उत्कृश्ट संस्था’

भांगरभूंय I खबरां मेज
पणजीः गोंय राज्य कला अानी संस्कृती संचालनालयाचे 2022-23 वर्सां खातीरचे राज्य सांस्कृतीक पुरस्कार जाहीर जाल्यात. कला आनी साहित्य क्षेत्रांत मोलादीक कार्य केल्ल्या 12 जेश्ठ मानेस्तांक ह्या पुरस्कारान भोवमानीत करतले. 2022-23 वर्सांतली उत्कृश्ट सांस्कृतीक संस्था म्हूण ‘श्री पांडुरंग प्रासादीक नाट्य मंडळ, सांखळी’ हे संस्थेची निवड केल्या.
कला क्षेत्रांतल्या नाटक, तियात्र, संगीत, साहित्य, चित्रकला, फोटोग्राफी, लोकसंगीत, लोककला, हस्तकला, भजन, किर्तन, चित्रपट अशा विवीध प्रकारांनी ​विशेश आनी तोणखायेचें कार्य करून नामनां मेेळयिल्ल्या 12 ज्येश्ठ मानेस्तांक तेच प्रमाण एके संस्थेक दर वर्सा राज्य पुरस्कारान भोवमानीत करतात.
अंदूंचे पुरस्कार फावो जाल्ले मानेस्तः
अश्विनी जांबावलीकार, केपें (भारतीय संगीत), सुर्या शेट्ये, मुरगांव (भारतीय संगीत), लिंदा ब्रागांझा, तिसवाडी (पाश्चात्य संगीत), जुझे आंतोनियो फर्नांडीस, साश्ट (तियात्र), पेद्रू सिरियाको बार्बोझा, तिसवाडी (तियात्र), तुळशीदास कवळेंकार, फोंडें (नाटक),गोपाळ राऊळ, बार्देस (नाटक), देविदास कदम, काणकोण (साहित्य), व्यंकटेश उर्फ अनिल कामत शंखवाळकार, बार्देस (साहित्य), सुरेश

मयेंकार, तिसवाडी (भजन), अनिता कुंडयकार, फोंडें (लोककला), मावरिसियो फर्नांडीस, तिसवाडी (हस्तकला).
वैयक्तीक पुरस्काराच्या स्वरुपांत रोख रु. एक लाख, प्रशस्तीपत्र, नटराजाची प्रतिमा, श्रीफळ अानी शाल भेटोवन भोवमान करतात. जाल्यार उत्कृश्ट सांस्कृतीक संस्थेक रोख रु. तीन लाख आनी यादस्तीक चिन्न भेटयतात.
पुरस्कारांची भेटवण खासा सुवाळ्यांत जातली. हे विशींची तारीख बेगिनूच जाहीर करतले, अशें कला आनी संस्कृती संचालनालयाचे संचालक सगुण वेळीप हांणी पत्रका वरवीं कळीत केलां.