भांगरभूंय | प्रतिनिधी
अध्यक्ष पांडुरंग कुट्टीकार : अर्थीक स्थिती विशीं आतां हुस्को ना
भांगरभूंय । प्रतिनिधी
पणजी : गोंय राज्य सहकारी बँक आतां डिजिटल सेवांचेर भर दितली. बँकेन एटीएम कार्ड सुरू केलां. आतां जी पे, पेटीएम सारक्यो सुविधा उपलब्ध करपाचेर भर आसतलो अशें राज्य सहकारी बँकेचे नवे अध्यक्ष पांडुरंग कुट्टीकार हांणी सांगलें. बँकेचे अर्थीक स्थिती विशीं आतां हुस्को करपा सारकी स्थिती ना, अशेंय तांणी सांगलें.
गोंय राज्य सहकारी बँक ही गोंयांतली आघाडेची बँक आसा. गोंयांतली ही सगल्यांत व्हड बँक आसा. कारभारांत सुदारणा करपा सयत सेवांचो विस्तार करपाक आपलें प्राधान्य आसतलें, अशें तांणी सांगलें.
म्हापसा अर्बन तशेंच मडगांव अर्बन बँको बंद पडल्यो. कांय वर्सां पयलीं राज्य सहकारी बँकेची स्थिती लेगीत हुस्क्याची आशिल्ली. मात सरकारान अर्थीक मजत करून हे बँकेक आदार दिलो. आपली आतांच अध्यक्ष म्हूण निवड जाल्या. बँकेचे एकंदर स्थितीचो अभ्यास करतलों. अभ्यास केल्या उपरांत सगल्यो गजाली कळटल्यो. सरकार तशेंच तज्ञांची मजत घेवन बँके विशीं आपूण निर्णय घेतलो, अशें कुट्टीकार हांणी सांगलें.
आयचें यूग हें डिजिटल आसा. पयशांचे चडशे वेव्हार ऑनलायन जातात. स्टेट बँक, बँक ऑफ इंडिया तशेंच हेर राष्ट्रीय बँकांची सगळे कडेन एटीएम केंद्रां आसात. जीपे, पेटीएम वरवीं पयशांचे वेव्हार करपाची सुविधा आसा. बँक तिगोवन दवरपा खातीर आतां डिजिटल वा ऑनलायन सेवां बगर पर्याय ना. एटीएम केंद्रां वाडोवप तशेंच डिजिटल सेवा सुरू करपाक प्राधान्य आसतलें, अशें तांणी सांगलें. सगल्या मुखेल शारांनी बँकेचे फांटे आसात. सगल्या फांट्यांचे वेव्हार बरे आसात. बिगर भांडवली मालमत्ता (एनपीए) पांचा परस उणी आसा. खण वेवसाय बंद पडल्या उपरांत बँकेक मार बसलो. रिणांची वसुली जावप कठीण जालें. खण वेवसाय सुरू जावपाची प्रक्रिया सुरू आसा. कांय खणी सुरू जाल्यात. हाका लागून खण वाठारांतल्या फांट्यांचे वेव्हार वाडटले. कर्मचाऱ्यांचो आंकडो लेगीत समाधानकारक आसा. पोरणे कर्मचारी दर म्हयन्याक निवृत्त जायत आसात. हाका लागून कर्मचाऱ्यांचो आंकडो लेगीत गरजे परस चड जावचो ना. डिजिटल सेवा सुरू करून बरी सेवा दिवपाक प्राधान्य आसतले. नवे उपक्रम आनी दर्जेदार सेवा दिल्यार बँकेची निश्चीत उदरगत जातली. हांवें आतांच ताबो घेतला. स्थिती जाणून घेवन हांव बँकेक ओंपून घेतलों, अशें अध्यक्ष पांडुरंग कुट्टीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
