राज्य मंत्रीमंडळांत रोखडेच फेरबदल

भांगरभूंय | प्रतिनिधी

केंद्राच्या दोन पंगडा कडल्यान मंत्री, आमदारांच्या कामाचो नियाळ

पणजी: राज्य मंत्रीमंडळ फेरबदलाचे फाटभुंयेर तीन म्हयन्यां पयलीं भाजपाच्या केंद्रीय फुडाऱ्यांनी दोन पंगड गोंयांत धाडिल्ले. ह्या पंगडांनी मंत्री, आमदारांच्या कामाचो नियाळ घेवन ते विशींचो सविस्तर अहवाल केंद्रीय फुडाऱ्यांक सादर केला. ते प्रमाण फुडल्या कांय दिसां भितर राज्य मंत्रीमंडळांत फेरबदल जातले अशी म्हायती भाजपाच्या वरिश्ठ फुडाऱ्यान आयतारा ‘भांगरभूंय’ कडेन उलयतना दिली.
फाटले विधानसभा वेंचणुकेच्या निकाला उपरांत काँग्रेसीच्या आठ आमदारांनी भाजपांत प्रवेश केले उपरांत मंत्रीमंडळ फेरबदलाची चर्चा सुरू जाल्या. उपरांतच्या काळांत फक्त एकदांच मंत्रीमंडळ फेरबदल जावन काँग्रेसींतल्यान भाजपांत आयिल्ले आलेक्स सिक्वेरा हांकां मंत्रीपद दिल्लें. उपरांत सद्याच्या मंत्रीमंडळांतल्यान आनीक दोन मंत्र्यांक काडून तांचे सुवातेर नव्या आमदारांक संद मेळपाची शक्यताय उक्तायताले. तेच फाटभुंयेर लोकसभा वेंचणुके उपरांत भाजपाच्या केंद्रीय फुडाऱ्यांनी दोन पंगडांक कांय दिसां खातीर गोंयांत धाडिल्ले.
मंत्री आनी भाजप आमदारांनी फाटल्या अडेज वर्सांत केल्लीं कामां, तांचो लोकां कडेन आशिल्लो संपर्क तशेंच तांचे कामगिरीचो नियाळ घेवन अहवाल सादर करपाचे निर्देश ह्या दोन पंगडांक दिल्ले. ते प्रमाण ह्या पंगडांनी मंत्री, आमदारांच्या कामगिरीचो नियाळ घेवन सविस्तर अहवाल सादर केले उपरांत केंद्रीय फुडाऱ्यांनी मंत्रीमंडळ फेरबदलाच्यो हालचाली सुरू केल्यात, आनी फुडल्या कांय दिसांत मंत्रीमंडळांत फेरबदल जातले अशें ह्या फुडाऱ्यान सांगलें.

मजगतीं, राज्य मंत्रीमंडळांतल्या फेरबदलाच्या चर्चांक परतून ओतो आयले उपरांत मंत्री जावपा खातीर इत्सूक आशिल्ल्या भाजप आमदारां मदीं खोशयेचें ल्हार पातळ्ळां. जाल्यार मंत्रीमंडळांतल्या कांय मंत्र्यां मदीं निरशेणी पातळ्ळ्या. पूण फाटल्या खूबशा म्हयन्यां सावन हे विशींची फक्त चर्चाच जायत आशिल्ल्यान भाजप फुडारी, पदाधिकारी आनी कार्यकर्त्यां मदीं मात गोंदळाची स्थिती आसा.

मंत्र्यांच्या खात्यांनीय जातले बदल

मंत्रीमंडळ फेरबदला सयत मंत्र्यांच्या खात्यांनीय बदल जातले. लोकांचे नदरेन म्हत्वाचीं खूबशीं खातीं सद्या तीन ते चार वरिश्ठ मंत्र्यां कडेन आसात. तांचे कडेन आशिल्लीं कांय खातीं हेर मंत्र्यां कडेन दिवपा विशींय केंद्रीय फुडारी विचार करीत आसात. मंत्रीमंडळ फेरबदल जातकच रोखडीच मंत्र्यांच्या खात्यांनीय बदल जातले अशेंय ह्या फुडाऱ्यान स्पश्ट केलें.

प्रवीण आर्लेंकाराक दिल्लींत आपोवंकूच नाशिल्ले

भाजपाच्या वरिश्ठ फुडाऱ्यांच्या आदेशाक लागूनच हांव दिल्ली गेल्ल्याचें पेडणेंचे आमदार प्रवीण आर्लेंकार हांणी शेनवारा ‘भांगरभूंय’ कडेन उलयतना स्पश्ट केल्लें. पूण आर्लेंकार हांकां भाजपश्रेश्ठींनी दिल्लींत आपोवंकूच नाशिल्ले अशें मुखार आयलां. प्रवीण आर्लेंकार दिल्लींत नेमके कित्याक खातीर गेल्ले हाचो उलगडो प्रदेश भाजपा कडल्यान जावपाची शक्यताय आसा.

• राज्य मंत्रीमंडळांतल्या फेरबदलाची चर्चा सुरू आसतनाच मुख्यमंत्री डॉ. प्रमोद सावंत तीन आमदारांक बरोबर घेवन जीएसटी आनी अर्थसंकल्पपूर्व बसके खातीर राजस्थानांत गेले. हाचे वेल्यान आमदार विजय सरदेसाय हांणी आदले मुख्यमंत्री सर्गेस्त मनोहर पर्रीकार हांचें उदाहरण दिवन मुख्यमंत्री आनी सरकाराचेर निशाणो सादलो.
• आमदारांच्या मतदारसंघांतल्या कामांचो नियाळ घेवपा खातीर पर्रीकार दुचाकी वेल्यान भोंवताले, अशी यादूय तांणी करून दिली. ताचे वेल्यान प्रदेश भाजप म्हणयारे गिरीराज पै वेर्णेंकार हांणी विजय सरदेसाय दुटप्पी आसून 2017 पयलीं तांणी पर्रीकार हांचेर आरोप केले. 2019 वर्सा त्याच पर्रीकारां कडेन हातमेळोवणी करून ते सरकारांत आयले. पूण 2019 वर्सा सरकारांतल्यान धांवडायले उपरांत तांणी परतून आरोप सुरू केल्ल्याचें वेर्णेंकार हांणी म्हणलें.