भांगरभूंय | प्रतिनिधी
पणजी : राज्य मंत्रिमंडळाच्या फेरबदलाच्या चर्चांक वेग आयला आसतनाच मुख्यमंत्री डॉ. प्रमोद सावंत आनी भाजप प्रदेशाध्यक्ष दामू नायक हांचे सयत एक मंत्रीय दिल्लींत दाखल जाला. मंत्रिमंडळ फेरबदलाचे फाटभूंयेर ह्या सगल्यांची केंद्रीय फुडार्यां कडेन परत बसका जातली. हाका लागून खंयच्याय खिणांक मंत्रिमंडळांत बदल जावपाची शक्यताय राजकीय मळार उक्तायतात.
विधानसभेच्या अर्थसंकल्पीय अधिवेशनाच्या निमाण्या दिसा प्रदेशाध्यक्ष दामू नायक हांणी दिल्ली दौरो करून मंत्रिमंडळ फेरबदलाचे फाटभूंयेर वरीश्ठ फुडार्यां कडेन गुप्त बसका घेतिल्ल्यो. उपरांत रोखडेच मुख्यमंत्री डॉ. सावंत आनी दामू नायक हे दोगूय दिल्लीक गेल्ले. ह्या दोगांयकूय परत मंगळारा दिल्लीक आपयिल्ले. मात, ते पयलींच दिल्लींत दाखल जाल्ल्यान मंत्रिमंडळ फेरबदलाचे प्रक्रियेक वेग आयिल्ल्याचें स्पश्ट दिसता.
मजगतीं, तीन दिसां आदीं प्रुडंट चॅनलावेले ‘हेडऑन’ कार्यावळींत उलयतना मुख्यमंत्री डॉ. सावंत हांणी सांगिल्लें की, येवपी विधानसभा वेंचणूक जिखपा खातीर मंत्रिमंडळांत फेरबदल करतले. एका- दोग मंत्र्यांक काडटले. उपरांत रोखडेंच ते दिल्लीक दाखल जाल्ल्यान मंत्रिमंडळ फेरबदल खंयच्याय खिणाक जावपाक शकता, हाचेर शिक्को बसला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
